Rahul, Sonia & Manmohan nungertemi Meghalaya semdangtsü

Shillong, Tsüklai 09 (Agencies): All India Congress Committee (AICC)-i Meghalaya Assembly Election atema tongtipang nüboyimtsür 40 shimogo.
Iba osang ya Shillong MP Vincent Pala-i yashi metetdaktsü aser pai ashiba agi AICC-i star campaigner 40 tenüngtem agizükogo saka parnok state-i kodang arutsü’ar anogo meshimtet.
Tenüngtem shimtetba rongnung AICC Tir Rahul Gandhi, taoba AICC Tir Sonia Gandhi, taoba PM Manmohan Singh, Congress lennirtem- Oscar Fernandes, Salman Khurshid, KV Thomas, Shashi Tharoor, Gaurav Gogoi, AK Antony aser CP Joshi nungertem dena lir.
AICC Tir Rahul Gandhi-i Tsüklai 17 & 18 anogotem semdangtsü akok saka taoba Prime Minister Manmohan Singh-i kodang semdangtsü’ar mejangja ta Pala-isa ashi.
Congress-i celebrity shirnok anir arutsü ta osangbeneri asüngdang dang Pala-i, “iba tebilembaji tajung saka party den züngsema aliba celebrity tem dang anir arutsü,” ta langzü.
Party indang manifesto renemdar aser Chief Minister ket nungi tatembang telemtetba ano mangu. Onoki Tsükali 15 tashi nungbo manifesto sayatsü ta MPCC working president-isa shisem.
“Yimya agi political party ajaki Congress indang manifesto mezüng sayatsü atar aser iba sülen parnoki ibaji ajizüka yanglur. Iba jagi onok kümdangshir,” ta Pala-i ashi.
Congress indang manifesto nung lanurtem, tsünüsenbongtsü, shisaluyimba, mapa manguba, saisapong, communication aser connectivity nung temulung agütsütsü, ta paisa shisem.
Congress-i Meghalaya nung election nüboyimba sentong balaka metenzük saka BJP-ibo mapa tulu inyaker aser parnoki election campaign video van 30 sayaba den rally tem ayonga agir.
Iba atema MPCC lennir Pala-i ashiba agi, “nenoki medemdangra, BJP ji Meghalaya nung party tasen ka lir aser iba jagi parnoki public atsür arutsü atema mapa aika inyaktsüla, ajisüaka Congress yabo tera yanga aliba party ka lir.”
“Parnoki mapa aika inyaktsüsa akümer. BJP-i aika jembir saka onoki mapa aika sayur. Parnoki iba mesükba maparen ajanga parnok aliba sayutsüsa akümer” ta Pala-isa shisem.