Raj Bhavan nung Aenjeti 28 nü Dr. T Ao indang Birth Centenary semzüktsü

Aenjeti 19, 2018 anogo Raj Bhavan nung asür Dr. T Ao sor küm 100 ajungba benjongmung atema Nagaland Angh, PB Acharya-i anir State Level Committee aser ketdangsertem senden amenba mapang tangokba noksa nung angur.

Kohima, Aenjeti 19 (TYO): Dr. T Ao sor küm 100 ajungba benjungmung sentong ya Raj Bhavan, Kohima nung Aenjeti 28, 2018 anogo tenzüktsü aser iba sentong nung Nagaland Angh, PB Acharya tongti tesemdanger asütsü.
Asür Dr. T Ao sor küm 100 jungmung nüngtem nung shima aliba State Level Committee tem den Nagaland Angh-i Raj Bhavan nung Aenjeti 19, 2018 nü ajurutep. Iba senden nung Dr. T Ao kerakyanglu ka Raj Bhavan nung semzüktsüba, pa nüngtem nung postage stamp sayatsüba aser state nung aliba district ajunga nung Junior Football Tournament ayongzüka agitsüba sentongtem küm tepiyong mungyonga aotsüba atema Angh-i metetbela liasü.
Department of Health & Family Welfare aser Youth Resources & Sports ajanga reju balala semdanga saisapong metsünga-reta amshiba aser iba ajanga tajangzük anguba indang kuli süa jajatsü.
Küm tepiyong mungyonga aotsü aliba benjongmung nung Dr. T Ao Inter District Football Tournament, Dr. T Ao Sports Academy aser Dr. T Ao Stadium yanglutsü atema long azüngtsüba sentongtem densema lir. Iba benjongmung nügtem nung Dr. T Ao indang Documentary aser Coffee Table Book sayatsü lir.
Iba benjongmung lapokba sentong nung Dr. T Ao zünga intetdak, Cotton College, Guwahati, R. G. Kar Medical College & Hospital nungi Principal tem aser pai 1948 aser 1949 küm nung captain asüba Mohun Bagan nungi ketdangsertem ajatsüla, ta Governor Acharya-i iba senden nung ashi.
Dr. T Ao sor küm 100 ajungba benjongmung sentongtem ya Nagaland nung kisüng masü saka Delhi, Kolkata aser Guwahati amala tesemtem nunga amungtsüla, ta Angh-i shisem.
Iba senden nung Nagaland Chief Secretary, Pankaj Kumar, IAS, Advisor to Cm, Toshi Aier, IAS (Retd.), ACS & Finance Commissioner, Temjen Toy, IAS, Principal Secretary to Governor, Piyush Goyal, IAS, Dr. T Ao’er jabaso Er Indianoba Tally nunger den sorkar department balala ketdangsertem, Nagaland Olympic Association aser Nagaland Football Association nungi züngsemtem arua aden.