Rio aser Zeliang na indang ochimashi file tem kaktettsü: Dr Shurhozelie

Kohima, September 20 (TYO): Dr Shurhozelie Liezietsu-i aniba NPF Central pur Kohima nung NPF Central Headquarters nung tanü Consultative Meet ayonga agi.
NPF Central-i tang NPF sasep nung ken o adoka aliba tatsü-talang ajak benoka jembitepba sülen President Dr Shurhozelie Liezietsu aser pai aniba ketdangpurtem pusema nungittsü telemtetba agi.
Party züngsem kari party anema mapa inyakba aser senotsü amshia party raksatsütsü merangba atema NPF Central-isa mepelaba olen lemsatep.
Dimapur nung NPF nungi anenja aliba MLA tem aser MP-i ozüng alema General Convention jazükba aitsür, kechiyong parnok indang tebilembaji NPF raksatsütsü aser iba sülen parnok tanga telok nung adentsü atema dang lir, ta NPF Central-isa metetdaktsü.
Central Office nungi temelaba magii General Convention alitsü jazük, anungji Election Commission of India (ECI)-i iba sendenji magizüktsüla ta NPF Central-isa ayongzük.
NPF Central-isa Angh P.B Acharya-i anemsü agi sorkar nung ochimashi indang jembiba aitsü. Dr Shurhozelie-i aniba sorkari back-door appointments, developmental funds nungi agizükba, MKR Pillai ken o CBI nem agütsütsü atema mapa inyak saka Angh P.B Acharya-i anir sorkar atsüngdoktsü atema tasa atonga mapa inyak, ta parnokisa ashi.
Nagaland Assembly Speaker-i July 21 nü India Linük Temzüng alema par kinunger TR Zeliang indang Whip agizük, ta NPF Central-isa metetdaktsü.
Item ajakji liaka, ozüng amertemi tekaratiba nung ochi obendang agütsütsü ta tamang akar, anungji party züngsem ajaki aremzüka dang okadaki obendang agütsüba ata alitsü mepishir, ta NPF Central-isa metetdaktsü.
Neiphiu Rio aser Chief Minister T R Zeliang nati aniba NPF MLA telok kati telemsa adokdaktsü atema mapa inyakba atema jashia Dr Shurhozelie Liezietsu-i “parnoki onok kangasa ajungmesora, onoki file tem kaktettsü. Tena Chief Minister inyakba mapang sen crore meyirjang aika indang contract maparen, teindokba jenjang kanga agi talila yanglubatem lir aser itemji yimjak nung metetdaktsütsü” ta ashi.
“Parnok yimdangi arutsü ta onoki imlar anungji onoki repranga atatsü” ta Dr Shurhozelie-isa ashi.
Party lennir kari pa dang tekong memerangtsü aser MLA kar tanaben party nung dennüra agizükang ta mepishiba atema Dr Shurhozelie-i ashiba agi, “nisung kari parnok aibelen angateter meyipa arunüra, onoki parnok pelashishia agizüktsü.”
Tanü NPF Central Headquarters nung adenba party züngsem ajak ya ochishirtem aser Naga nunger o party chichiba meimertem lir, ta Dr Shurhozelie-isa shisem.
“Asenoki tali süoki ia bilemtsüla aser asen tangatetbatem teküpoktiba jenjang nung alirtem tonga oa metdaktsütsüla” ta paisa ayongzük.
Nagaland nung Naga nungertem atema nokdakba telokji NPF dang lir aser regional Party ya iba ya dang lir. Anungji tangari asen party meraksadaktsütsü atema asenoki nokdaktsüla, ta NPF President-isa ashi.
Tang NPF nung mepetmesü adokba atema mepelar, saka ano külen iba ya temoatsü ama lir, kechiyong iba ama mapang asenoki asenok kechi jenjang nung lir aser kechi inyaker ta süoki ia bilemtsü, ta paisa shisem.
“Asenok sorkar ka lir, asen minister aser parliamentary secretary temi parnok NPF ta ashir saka parnok NPF party raksatsütsü atema kanga mazünger. Parnok office-ibo maoer saka sen indang file tembo parnok kidangi bener aoer. Parnok iba nungjibo kanga teyakyak saka parnok tekolok nungbo kecha mali. Item ama nisungtem nem sorkar ketdang mesüdaktsütsüla” ta Dr Shurhozelie-isa ashi.
“Taruba election nung asenoki sorkar tanga ka kümtettsüla. Aji asünungdang sorkar jagi Nagaland nung aliba nübortem asoshi mapa inyaktsü” ta paisa ayongzük.
Tanü senden nung MLA Yitachu, MLA N Thongwang aser MLA P Longon, NPF Working President Huska Yepthomi, NPF Mokokchung division, Wokha division aser Kiphire division nungi lennirtem den Manipur aser Arunachal Pradesh nungia teshimtet nübotemi o jembi.
Senden nung NPF Central aser district balala nung NPF divisions ketdangpur tasen 31-i tenangzükba agi. Senden nung mendenji NPF Secretary General & MP Rajya Sabha K G Kenye liasü, NPF CEC Member E T Sunep-i temoatsü meshia sarasadem, NPF Central Women Wing Working President Khriezobeinuo Sanchu-i tesentepertem pela agizük aser Secretary T Lotha-i anküp tepela o jembi.