Rohingya nunger tepsetba kuli tejangja bushitsüla : US

Yangon, Tsüklai 09 (Agencies) : Myanmar nung Rohingya nunger Muslim-tem tepsetba indang Reuters osangbenertemi bushisüngdangtsü tenzükba sülen, tang US State Department-ia iba tashiyim maparen indangji tera tonga luagi bushitsüla aser iba dak sendakba report yangludang pua aliba Reuters osangbener anajia chioktsüla, ta metetdaktsüogo.
Rakhine state kübok Inn Din yimtsüng nungi Rohingya nunger nisung ter koma tepset aser parnokji kidanger Buddhist nunger aser sepaitem jagi tepseter koma külemi rema toktsü, iba indangji ghonda ishika tejaklen sangdongba ‘special report’ nung tatongi shia lir; parnokji kar zükset aser kar injang agi kaset.
US State Department nung otongdatsür, Heather Nauert-i ashiba agi, “Taoba mapangtem nung nisung tepseter külemi dang tesem ka nung rema yutsüba osang sangdongba ama, northern Rakhine nung tashiyim maparen inyakba indangji kanga dang rongdak ama bilema kuli tejangja bushisüngdangtsü asoshi Burma nunger ketdangsertemi amalitep akatsüla, ta tang tesüsa sangdongba report nung shia lir.”
“Yamaji bushisüngdangba ajanga atangji nung kechi atalok, tasürtemji shirnoksa liasü, shirnoki meimchir temeten anema inyak item ajakji kuli tejangja metettsü aser iba denji liromedema ochi temeten agütsütsü,” ta laisa ashi.
Tang Reuters osangbenertemi renemba reportji Buddhist nunger shirnoki Rohingya nunger kidang mi senoktsü ta nangzükogo, parnok dang asüngdangyar renem.
Parnok jagi ashiba agi, taoba Luroi ita Rohingya nunger telungpurtemi security posts amakba agi jashir mit adoka Muslim nungertem tepset aser tasümang balala bendener külemi dang rema yutsü, ta kasa report nung shisema lir.
Nisung jenti tepsetba indang Reuters osangbenertemi ngutetba kuliji tejanga asü ta asüngdangba ka langzüdang, “Meimchir temeten anema meinyak ta onok mashir aser kuli tejangja lira sorkari bushisüngdangtsü,” ta Myanmar sorkar nung otongdar, Zaw Htay-i metetdaktsü.