SEMPETTEM MATHI 13:24-35

ANÜ AIBA TOBUR TAJUNG

Shibai tesangwa agi süoshi ama ne sasa sobua lir. T. Ken 104:2

Anü aiba mapang asenok tzüyim kümbangi ora mesüra tenem kolaki tura, anü aiba tobur tajung jangratemtsü ka angur. Anütsüng nung anüng sentsü balala aser mepet sentsü balala angur, aser anüolen anüng sentsü melenshiba angur.

Anü aiba sentsü anata putepa mali; ajak jangratemtsü ka tobur tajung lir. Science-i item sentsü tapu balalaji rasaa ashir, saka Khristan kati iba yimya Tesülenji ajak Metetsang Tsüngrem teka aliba metetter. Anütsüng Pai sentsü atepbaji tabensa.

Asen Kibubaji tobur tajung Kibur lir, aser Pai asenoki tobur tajung temeshiba nung Pa külemtsü aginer. Asenok taküm nung Pa temeshiba, temeim, shisatsü aser tashi ngudaktsütsüla. Anogo ka nungi ka Pa shibai asenok yanglu Pa mesüka asenok melenshitsüla. Iba nükjitong asoshi Pai asenok nem Pa osangtajung tekümtet agütsü.

Anü aiba tebur tajungji tatsü ka dang alir. Aji saka ibai anogoshia adoker. Asen Kibuba teyangluba nung tebur tajung koda talubusa lir! Asenok peladaktsütsü asoshi iba tebur tajung Tsüngremi asenok nem agütsü aser ibaji reprangtsü asen tenük kodanga ania makümer.

Kibuba tobur tajung anüng nung adoka sayur. Pa tesangwa asenok taküm nung yadaktsütsü Pai asüngdanger. Anogo shia tangar madang asen mapa tajung agi yadaktsüba ajanga parnoki asen mapa tajung ngua, kotak nung aliba asen Tebu sentsüwangshidaktsür.

Kotak nung aliba Obala, Ne Tanela ajanga onoki Na asoshi yadaktsütsü onok dang yariang. Amen.