Sen mesüra olulu nem manishidaktsütsüla: C Apok Jamir

Dimapur/Mokokchung, Tsüklai 13 (TYO): Odisha Angh, Dr SC Jamir’er jabaso aser Mokokchung town Assembly Constituency nungi asemben tashi MLA inyaka arusang, C Apok Jamir-i nüburtem dang, senotsü mesüra olulu nem manishidaktsütsüla, ajisüaka taruba election nung pei vote kanga shisa kaa agüjang, ta ayongzük, ta tanü Press Bureau, Naga People’s Front, Central Headquarters, Kohima, Nagaland sangdong ka nung metetdaktsü.
Tanü Mokokchung jila nung par kidang pa taruba election nung NPF Ticket nungi tokteptsü atema sangdongba sentong nung Apok Jamir-i par constituency kübok nüburtemi küm aika pa dang temeim sayuba aser pa dak tamang katetba atema pelaba metetdaktsü.
Paisa, tia makai pa opposition nung dang aliba aser küm ishika pa sorkar nung aliba mapang nung yimtenren nung mepetmesü aliba ajanga nüburtemi imlaba ama meinyaktetba asoshi tatok meshi.
Paisa nüburtem dang senotsü mesüra olulu nem manishidaktsütsüla, ajisüaka lokti aser state ajungtsü atema tangatetba tajung nung shisa kaa pei vote agutsütsüla, ta metetdaktsü.
“Ni anema tejashiba kar danga lira, ibaji toktsür nenoki tamang katetba, tangatetba aser asalentong tajung aliba party nem vote agüjang,” ta paisa ashi.
NDPP-BJP teloktep dak sendakba nung Apok Jamir-i, tamalen NPF ya BJP den teloktep partner ka liasü, ajisüaka BJP-i shilem tilaka dang agi, aser ibajibo NPF-i BJP den salemba amai dang liasü, ajisüaka NDPP-ibo BJP ji teloktep tajung ka kümdaktsüogo aser iba teloktepjibo ozüng alema aruba bendangertem sotetba ama asütsü, kechiyong BJP tangatetbatemji Naga nunger libaliro den mapet, ta metetdaktsü.
Kasa sentong nung NPF Mokokchung Division Tir, Moasangba Jamir-i, NPF-i Naga nunger atema teti nokdaker, ta metetadktsü.
Moasangba-isa, “NPF-i Naga nunger yimyim ‘Solution before Election’ atema nokdak, aser Naga nunger asoshi election nung shilem magitsü atema tatem tashi ataa liasü, ajisüaka onoki 1998 küm amatu matalokdaktsünüba ajanga tanga yimtenren party temi inyakba ama inyaktsüsa aküm,” ta metetdaktsü.
Constituency nungi candidate tenüng asangba oren ka nung Moasangba-i, “Lenir kaji aonung ka kija nungbo mekümtet, iba nungji lenla aika lir. Ajisüaka Apok Jamir dak lenirtem dak aketba senpet tajung aika lir, iba denji külemi pai dak shisatsü tajung aika lir aser aika ajangshia lir,” ta metetdaktsü.
Iba sentong ya Mokokchung AC Tir, Salingpong leniba nung agi, aser Chubawati, Atemjenba, Alemtoshi, Toshiyabang aser Aochuba nungeria o tatsütsü jembia liasü.