Senyong nisung taküm

Nagaland nung tashiyim agi saruba saru magütsüba agi nisung taküm agitsü merangba mapa ya tetsübutsü mapa rongnung ka lir. Aji oda, yakanü Dimapur nung NSCN-K teloki Cold Storage kibur ka tenüng agi L.Doulu kasettsü merangba kuliji pai saru magütsüba agi liasü ta janjaogo. Tia junga pa taküm injang lendong nung jagi kümzüogo. Ajisüaka, tia majung mekümzükteti ka asü nunga,Naga nunger yimten nüchiso bushir telok ka nem saru magütsüba agi Naga nunger rongnung kanga meranga business inyaker nisung tajung ka taküm samar lila ta tsürenseta bilemer. Ibai Naga nunger telong aser tema nung alirtemi ano khen jungjunga bilemdangtsüla. Atangji, kin ka asoshi yimten nüchiso bushiba mapa nung nübo dang masü rongsen aika nüngdaktsü, anungji nübortemi mulungsua yariteptsüla. Ajisüaka, nübortem tsübudakja saru saruba agi linük tenzükba mapa inyaktsübo jangramatem aser tim masü. Iba jagi nübortem dang masü saka tesarur dena takoksa angutsü. Tanü Nagaland nung timtem kaji linük tenzüker telok aika aser item ajakji nübortem dang nungi saru saruba agi taküm alitsü meranger. Iba amaibo talangka moutettsü, anungji linük tenzükertem kanga shisa akatsü nüngdaker. Iba ama lendong paidoktsü asoshi ACAUT teloki Naga lima nung Naga nunger atema yimten nüchiso bushir telok ka aser sarua ka dang asütsüla ta mapang talangka ayimtena arur. Atangji, linük saru magütsüba atema nisung taküm agiyonga ao nungbo nisung taküm agi matitsü, anungji iba ama tetsübutsü mapa ya nokdangtsüla. Aiben asenoki tangar dak lendong timtem atalokdang süoki ia mebilemi toktsür. Aji oda, tangar dang saru meshir aser ibaji magütsüba atema merenshir aser taküma dena samatsür saka asen dak ataloker masüji ta ser ola madoki toktsür. Ajisüaka, tanü tangar dak atalokbaji asüng asen dak ataloktsü. Iba tangatetba nung tetsübutsü mapatemji anema metsübui nübortem ajaki ola adoktsüla. Germany nunger pastor Martin Niemoller-i Germany nung Hitler aienba mapang pa dak atalokba otsü ka ashiba ama, ” mezüng parnoki ( Hitler teloki) Communists purtem bushia aru, saka ni ola madok kechiaser ni Communist masü; ano parnoki Trade Union nung inyakertem bushia aru, idangjia ni ola madok kechiaser ni Trade Union nung inyaker masü;  ano parnoki Yihuda nung bushia arua, idangjia ni ola madok kechiaser ni Yihuda nunger masü aser tesüsa parnoki ni bushia aru saka idangjibo ni asoshi jembitsür shinga mali asü.” Martin Niemoller-i ashi ama, tanübo parnoki business inyakertem bushir, anungji asenoki ola madoker kechiyong asenok business inyaker masü; parnoki government mapa inyakertem bushir anungji asenoki ola madoker kechiyong asenok government mapa inyaker masü, ano parnokisa yimten yimsüsürtem bushir saka asenoki ola madoker kechiyong asenok yimsüsürtem masü. Iba amaji asenoki repranga lia ka khen, ka khen ta amokmerendaktsür aser tesüsa asen dangi arur, idangji asen atema jembitsür shinga malir. Kechi mapa südirsüaka tamajung mapa tsübua ola madoki yutsübaji pei asoshi lendong tulubaka ajurutsü renemer amai lir. Tetsübutsü mapa inyakertem anema nübortemi ola madokra tetsübutsü maka inyakertemji tali temulung ulutsü aser tamajung mapa tesashiba aser tuluba inyaktsü. Tanü Naga yimten tebilemtsü ya linük tenzükertemi kija akoktsüla tebilemtsü masü ibai nübortem ajak ka küma longjemer inyaktsüba mapa lir. Ibaji angateta linük tenzükertemi tashiyim agi nübortem dang saru mesarui o tajung jembia nübortem den shisalemsateptsüla. Iba amaji tangatetba nung kodang yimten mapa süoki ia inyakdir, nübortemi mesarudangyongi agütsütsü aser Naga yimten khuret ya külem khuret akümtsü. Iba tangatetba nung shirnoki mebilemdangi Naga nunger business inyaker Doulo kasettsü merangogo, parnoki Tsüngrem aser nisung dang taidok nangzüktsüla aser yaser kodanga sen melen nisung taküm aotsüsa inyaktsübabo tebilema mebilemtsüla.