Shisaluyimba jenjang ajungketba küm

– Among P. Aier

Linük yimtiba nung class 10 pre-board exams agütsür kaketshir noklang nungi shilem 31.5-i dang takok
anguba atema tejashi nung Delhi sorkar kübok education department-i sorkar school tesayur aser principal tem merenshitsü atema mapa inyaker. Tatidang nung kanga mejungi tamakok anguba school tem nung tesayur aser principal tem merenshitsü ta education department-i metetdaktsüogo. Delhi nung tawa agiba class 10 pre-board exams nung kaketshir 1,34,200-i agütsü saka parnok 42,224-i dang takok ngua liasü. India nung shisaluyimba wadang tsütsü tebilemtsü ajurubaji Delhi nung dang masü aser 2017 atema Annual Status of Education Report nung ashiba agi, arishi küm 14 nungi 18 tsüngda aliba kaketshirtem rongnung shilem 40-i anütetsü nung mapang meshiteteter aser shilem 57-i maths tezüba-a meinyakteter. Annual Status of Education Report nungsa kaketshir pezü rongnung katibo pei oshi nung junga zünga mouteter ta bushitetba shia lir.
Sorkar school tem nung tesayur aser principal tem dak dang tai tongloktsüba ya junga mebilemdangi inyakba mapa ka lir, kechiyong kaketshirtemi takok junga mengutetbaji tesayurtem peria maliba agia asütsü akok. Delhi sorkar nung Department of education-i bushitetba osang ka ajanga ashiba agi tesayur mapa 66,736 tashi adoka lir saka iba nungi tesayur 38,926 dang shimoka lir. Iba jagi Delhi nung aliba sorkar school tem nung tesayur mapa shilem 58.3 tashi tazüng lir ta sayur. Sorkar school tem nung tesayurtem anüngaka küm 8 jungnüa Delhi nung tesayurtem direct recruitment ka dang süa mali. Linük nunga sorkari lapokba primary school tem nung tesayur mapa lemzükja aliba noklang nung shilem 18 tazüng lir ta Luchii 2016 nung Human Resources Development minister-i Lok Sabha nung metetdakja liasü. Nübo agi meperiba dang masü saka sorkar school tesayur aika jangrabara meinyakba den ano parnok nem Census mapa aser field survey amala mapa talila lemzüka inyakdaktsüba ajanga tapok adoker südi ta bilemer. 2016 küm Central Board of Secondary Education (CBSE)-i Common Teacher Eligibility Test agiba nung tesayur noklang nung shilem 13-i dang takok angu. Sorkar school tem jenjang mejungi akümba ya 1980s mapang nungi tenzük aser iba mapang state temi senotsü peria manguba agi contract inyakyim nung tesayurtem mapa inyakdaktsü. 1966 küm Kothari Commission-i linük indang Gross Domestic Product (GDP) nungi shilem 5-bo shisaluyimba maparen atema amshi nung junger ta tebilemba ka shidang aser iba sülen küm 50 dak tema arudang India-i shisaliok nung sen ishika dang endoka arur. 2009 küm Right to Education Act tenzükba sülen tesayurtem shimokba aser service telatetbatemji state sorkartem indang tebilemtsü aküm saka Centre-ia shisaluyimba tsütsü state tem yaritsübaji kanga tongtipang lir. Jila aser yimtsüngtem nung sensakertem azüngba school tem nung tesayurtem nem training tajung agütsütsüla aser parnoki classroom nung jungjunga sayutettsüla. India nung tesayur million 1.3 training agütsütsü alizüng yur mapa ka tenzük saka ibaji lateta aliba mapang nung metemtettsü asüba yong Metsüremi 2019 tashi agitsü atema mapang atsülangogo. Tsüklai 1, 2018 nü Parliament nung Union Budget 2018-19 indang osang metetdaktsüdang finance minister-i tesayurtem nem training aser tesayuba agütsüba indang shisemogo aser ibaji kanga dang nüngdaka aliba mapa tajung ka lir. “Sorkari tanurtem school züngdaktsütettsüsa mapabo inyaktetogo saka shisaluyimba jenjang mejungi lir. Anungji, shisaluyimba ya telemsa melii nursery nungi class 12 tashi temulung agüja aser nendaka inyaktsü tim” ta Finance minister Arun Jaitley-i o jembidang ashi. Union Budget 2018-19 nung education telemsa nung sen benoka aliba nung school education atema sen crore 50,000 aser higher education atema sen crore 35,010 lemzükja lir. School sector nung SSA atema sen crore 26,128 (taoba budget nung crore 23,500) aser RMSA atema sen crore 4,213 (taoba budget nung crore 300 agi teimba) benoka lir. Maneni Mid-day-Meal atema sen crore 10,500 enokogo aser iba taoba Budget dang nungi crore 500 agi talila lemzüktsüogo. Anungji, Union Budget ji reprangdangra taküm küm ya India nung shisaluyimba dak sendakba maparen nung temelenshi aruba aser tajangzük anguba küm ka asütsü ta imlar.