Sindhu-i akok saka India tsük

Alor Setar, Tsüklai 09(Agencies): Rogonü Badminton Asia Team Championship asayamung nung India team-i shilem agia asaya aruba nung tanü Indonesia team den quarter-final nung 1-3 agi mokoki India tsükogo. Yangtepnü asaya nung Japan den tamakok anguba ama, tanü India nunger Indonesia den tsük. Rogonü asaya nung India tsür rongnungi PV Sindhu-i dang takok angu. Mezüng kija asaya nung lai Indonesia tsür, Fitriani Fitriani madak 21-13, 24-22 agi takok angu.
Iba sülen India team pur kanga mejungi asayateta tanüngba match asemprongla nung tamakok alu.
Mezüng tetsür tarep asaya nung Indonesia tsür Greysia Polli aser Apriyani Rahayu nati India tsür Ashwini Ponnappa aser Sikki Reddy madak 21-5, 21-16 agi akok.
Tanabuba tetsür kija asaya nungi Indonesia tsür Hanna Ramadini kanga junga asayateta India tsür Priya Kudaravalli madak 21-8, 21-15 agi koktet.
Maneni tanabuba tetsür tarep asaya nung Indonesia tsür Anggia Shitta Awanda aser Mahadewi Istarani nati India tsür Sindhu aser Sanyogita Ghorpade na madak 21-9, 21-18 agi takok angu.