Skiing nung Aanchal Thakur-i India nunger asoshi otsü tasen yanglu

Erzurum, Aenjeti 10 (Agencies): Manali nung aliba jila tila süaka tepur tajung ymitsüng ka nungi Aanchal Thakur-i otsü tasen ka yanglua India nunger rongnungi skiing nung mezüngbuba international jenjang nung medal nguogo. Erzurum, Turkey nung aliba Palandoken Ski Centre nung Federation Internationale de Ski (FIS) ajanga ayongzükba Alpine Ejder 3200 Cup nung Aanchal Thakur-i bronze medal angu. Aanchal ya ‘slalom race category’ nung toktepa liasü.
“Ita aika training agiba nung süngjang dangogo. Ni kanga junga tenzük aser kanga junga ani, koba ajanga tasembuba jenjang tongtet,” ta Aanchal-i Turkey nungi osangbener dang ashi. Lai iba takok anguba ya khenyongi balaka lir, kechiaser India nung asükwa mapang asayaba saisapong indang nüngdakbatem peria mali. Iba den külemi Union sports ministry ajanga iba winter sports nung temulung magütsüba ajanga iba asaya nung takok anguba ya kanga tanangba kümdaktsü.
Aanchal tebu, Roshan Lal Thakur ya Winter Games Federation of India (WGFI) nung secretary general lir aser par jala takok anguba ajanga kanga pela.
“Ni kü indang tepela ya tebang agi meshiteter. Lai tanur asüdang nungi kanga meranga training agia aru, aser iba medal ajanga la jangjaogo. Tangbo la teyari angutsü onoki imlar,” ta Aanchal tebui ashi.
Iba takok ajanga skiing meteter aser jangrartem kisüng masü saka India ajunga tejak denteta pelateper.
Aanchal-i iba takok anguba asoshi Ato Kelonser Narendra Modi aser Sports Minister Rajyavardhan Singh Rathore natia tepela lemsatepogo.
Ato Kelonser Narendra Modi-i Twitter nung, “Skiing nung international medal anguba asoshi kanga pelar @alleaanchal. Turkey nung aliba FIS International Skiing Competition nung nai otsü yanglua takok ngutetba asoshi linük ajunga pelateper. Tarutsü nunga iba ama takok angutsü imla atar,” ta zülutsü.
Rajyavardhan Singh Rathore-ia, “Turkey nung aliba FIS International Skiing Competition nung Slalom Skiing Bronze anguba asoshi tepela lemsateper @alleaanchal. India-i skiing nung mezüngbuba medal ngua account lapokogo,” ta zülutsü.
Aanchal ya Manali nung aliba Burua tesem nungi lir aser lai iba asaya ya tebu dak nungi angazük aser iba sülen taoba mapang Olympic asayar Heera Lal-i la nem training balala agüja arur.