Sorkar office nung inyaker ka jakla

~  I. Meren Lemtur, Kendriya Vidyalaya, Tuli.

Aima nung meimchir ka taküm nung pei taküm aser kibonga soshi meranga mapa kabosa inyaka alinung dang pei taküm kibong kaji lia oteter. Aji oda nisung shia tia balala Tsüngremi lemsaa tokja alinung nisung kar alu yima alitsüsa tia alir,ano karbo shishilembaba balala inyaka rongsen bushia pei kibong anir aoer.
Item ajak dak alakasa Tsüngremi kü nüm aser nü nümbo Govt-service pei pei akokba mapa ngua jangratema itasen chia alir.Anungji ni tanü iba oset tila ka ajanga lemsatepnübaji deptt. balala nung office nung inyaker tuluba nungi tilaba tashi pei mapa nung temulung agüja inyaktsüla. Khristan tajungka jakla mesüka tanüa kü teyari nüngdaka adianu,adianutsür kwika ni yaritettsü ta sarasatema kidang nungi apusoa aodangyongi na renemer ora, koda nübortem tsüngdang naji temeim akaba nisungka ta züngshitsü. .asenoki ya metetdi,adianu shirnok nü den mapa balala bener na ajirutsü arur parnokji ni aodang adianuba aser adianutsür yagi tanüa komaka kü den shilem agitsüar na ta shisabuluseta nü office jagi nüma-a metangteti arura ta nai bilemtsüla.Saka office nung inyaker karibo shiba nü dangi arur pa or la dak tenüka merangloktsüi o tesüpra agi jembir. Ano karibo mapaji komaa junga mereprang dangi asüng yanü dang arung ta shir yoker.
Ano nisung karibo tamasa shiba aru ta mesüi nai meteta aliba nisung mesüra pei yimerpei tsükong ta bensaa, tamasa arurbo rokongseta nokdaka toktsür nai mulungba inyaka sayur. Ano yimdak yimtsüng balala nungi tanü mapang tatsüka nung temer aotsü mapa bener bus nung mapang aria aru nung office nung inyakertem mapang shitak nung maru office kima mapang ajak indoka atatepdaktsür.
Na govt-i ita sen talang agüja nüburtem yaritsü nisung aika rongnungi na shimteta na office nung inyaktsüsa maongka angu nung sen magütsüra nai nü table nung sen magütsü tashi file ajak sota ayur. Adianu, nai tanü nisung ka nü office nungi mapang shidak nung mapatema inyaker yok dang, pa mesüra la nü office nungi tejak tesangwa nung ayazüka aobaji dang masü, saka kiyonger kodangang nai yariba osang tajungji ashitsü ta yongyaseta pelaseta aoer aser nü sempet tajungji kodanga amatsü makok, aser nü mapa tajungji kodanga samaa maotsü,aser tatishitsü tajung nung teti na aser ni bilemtettsü.Laishiba nung nenok süaka taküm alitsü ta ashiba ya nai ni akümli dang junga liteta aser inyakteta toktsütetra na aser ni süatokera teti asen mapa ajung akümlirtemi mamai bilemtettsü,aji sürang aseni amanga lira kotakia aotsü ta ashiba lir.Asen tebo Mahatma Ghandhi ashiba shin o “WORK IS WORSHIP” ta ashiba lir.
Temeim Khristan tajungtem,Yisu-i Pa alima nung alidang tulur takar srensaker kecha mebendangi pai pa temeim aria bilem agi sünga nisungtem yari. Ni tanübo mazüng, tangbo mazüng asüng yanü dang arung ta ashiba asenoki lai nung zülua mangur,teti mashi mapang nung pa nüngdakba purtem asoshi renema liasü. Anungji adianutem,na ama tangartema tuluka zünger mesüra nü dang nungibo paang tuluba zünga meteta liaka, külem adianubabo na ama Govt mapa inyaktsü mengutet ta nai shisadanga, ni yasa tia takatibaa ta bilema office nung Khristan tajung ka jakla mesüka(Me I help you?)ta asüba o tajungji temulungjang nung yur na aser ni office nungi mapatem temer nikongdang kidangi shilang dang,tangar ka nai yariba ajanga aonung yipden nung mangadaker, tanü mapa tajung inyakba bilemdanga amuzüka aotsüsa mapang tajungji alangzükdi ta lemsateper.