South Sudan nung nisung 25 tepset, Riek Machar telok aitsür

Juba, September 20 (Agencies): South Sudan indang taoba deputy president, Riek Machar, shiba exile nung lir, pa busemer temi sorkar indang mitkar dak Unity state nunga amak aser iba lendong nung civilian densema nisung 25 asü, ta ketdangser osang ajanga ashi.
Unity ya totzü atsüba tesem ka lir, saka rara adokba ajanga totzü atsüba anena lir.
Riek Machar busemer aser sorkar indang mitkartem tsüngta rara ya Bentiu jila anasa aliba Nhialdiu yimtsüng nung Hombarnü adok.
“Iba rara adokba tesem nung nisung tasümang 25 angu aser Machar’er telok ya meindokgog,” ta Northern Liech state nung Information Minister, Lam Tungwar-i ashi.
Iba rara nung asürtem rongnung tetsür, nisung taintem aser police ketdangsertem densema lir, ta Lam Tungwar-i ashi.
“Iba rara nung takok tulu nguogo aser tasü tait SPLA-IO rarartemi Nhialdiu kokteta sorkar indang mitkar 19 tepset aser prangbong injang aika rakzüktetogo,” ta SPLA-IO indang odongtar, Lam Paul Gabriel-i ashi.
Item asürtem ya timba civilian lir, ta Tungwar-i ashi.
NhialDiu tesem nung yimjung alitsü asoshi kin balala den senden amenba mapang iba lendong ya adalok, ta South Sudan tatong tir, Taban Deng Gai indang mitkar odongtar, Dickson Gatluak Jock-i ashi.
Sudan nungi 2011 küm nüjiso anguba sülen South Sudan nung December 2013 nungi Tir Salva Kiir-i aniba mitkartem aser Machar busemer tsüngta rara tenzük.
August 2015 küm iba telok ana tsüngta peace accord tezüngzüktep agi aser taoba küm April ita Machar ya South Sudan yimtiba Juba-i arua Kiir den iba linük nung yimsü asütsü tashi lemsa.
Saka ita asem majungdang iba tezüngzüktep raksa aser Machar den pa busemertem Juba doktsür jena ao.
Iba linük nung yimden yimli raktepa rara tenzüker tang tashi nung nisung meyirijang aika tepsetogo aser nisung million 3.5 dak tali pei talidak ki doktsür aotsüsa aküm.
Iba rara ajanga alima nung refugee tebilemtsü kanga kera züina ao aser iba rara atema telok anaprong aitsür.