State 8 nung Hindu nunger ‘minority’ jenjang angutsü akok

New Delhi, November 11 (Agencies): India kübok state 8 nung Hindu nungertem minority lir aser iba atema Supreme Court-i PIL ka benokba nisung dang National Minorities Commission dangi aotsü atema ashi.
“National Minorities Commission dangi oang. Parnoki ang iba onük atema telemtetba agitsü. Onoki iba atema telemtetba magitettsü” ta Justice Ranjan Gogoi-i aniba bench kati senior advocate Arvind Datar dang ashi.
Iba PIL ya Delhi BJP lennir aser advocate Ashwini Upadhyaya-i benokba lir.
2011 Census nung Hindu nungertem Lakshadweep nung 2.5%, Mizoram nung 2.75%, Nagaland nung 8.75%, Meghalaya nung 11.53%, J&K nung 28.44%, Arunachal Pradesh nung 29%, Manipur nung 31.39% aser Punjab 38.40% dang lir ta shia lir aser ibaji telok tilaba lir, ta Upadhyaya-i PIL nung metetdaktsü.
Telok tilapurtem tajangzük agütsübatem telok tuluba ka nem ang agütsür aser ibaji ozüng alema inyakba mapa ka lir, kechiyong October 23, 1993 nü National Commission of Minority Act nem tashi agütsüba nung ajemdaker Centre sorkari telok pungu- Muslim, Khristan, Sikh, Buddhist aser Parsi nungertem ‘minority’ telok ta züngokba shia lir. 2014 nung Jain nungertema iba nung züngokogo saka Hindu nungerbo mezüngok lir, ta paisa ashi.
“State 8 nung aliba Hindu nunger nem Arrla 25 nungi 30 nungi shia aliba ama, parnok tangutsü tim temetentem magütsür. Anungji Minority Community indang sangdongji külen tsütsü dang ashiba aser meshitak lir. Iba telemtetbaji India Linük Temzüng alema lir, ta Upadhyaya-isa shisem.
“Telok tilatem indang temetentem kümzüka ayutsü atema Centre-i state jenjang nung tamangba yimsü aser oshioben nung telok tilatem ajitettsüla. Talisa commission-i state jenjang nung masü saka national jenjang nungdang telemtetba agir anungji iba onük atema Supreme Court-i telemtetba ka agitsüla” ta pai benokba PIL nung shia lir.
“Arunachal Pradesh, Goa, Kerala, Manipur, Tamil Nadu aser West Bengal nung Khristan nütsüng aika lir, saka parnok telok tilaba ama züngshir. Iba amaji Punjab nunga Sikh nungertem teimba aser parnok Delhi, Chandigarh aser Haryana nunga nütsüng aika lir saka parnok telok tilba ta züngshir” ta ta paisa shisem.