Sudan linüki Pastor pongu apu

November 02, 2017: ‘Sudan linük nung yimjung raksatsür’ ta aija taoba hopta Arogo nung pastor pongu apuba indang tang iba linük nung pastor temi kanga bulua jembidar, aser parnoki ashiba agi, Muslim nunger dang sayutsüngiba aser Tasen Lai nung tesayuba ama aliba atema sorkari Khristantem nem temerenshi agütsür, ta ashi.
“Tasen Lai nung Osangtajung proktsü tuyuba ama yimjung nung inyakba atema sorkari Khristantem reshikangshir. Khartoum nung aliba jail nung ni ita 14 tashi puoka ayuba sülen ni anema kuli menguteti taküm January nung chiok. Ano iba sülen-a kuli makaba nung tan Deobarnü ni apu,” ta Pastor, Kuwa Shamal-i International Christian Concern dang ashi.
Alima nung Khristantem reshikangshiba osang ICC telok ajanga sangdonger, aser parnoki ashiba agi, tang tashi Sudan nung Arogo lenir pongu tepuokdak lir, aser parnokji- Rev. Ayoub Matin, evangelist Habail Abraham, Rev. Ali Haakim, Pastor Ambrat Hammad, aser putir Abdo Elbaya nunger lir.
Shamal-i, “Kechiba sorkari onok dang Arogo lenisüba nungi anener select committee ka tentettsü rongshir? onoki ozüng alema kechi tai inyak?” ta asüngdang.
SCOC mendenbuba, Rev. Ayoub Tiliyan-i, taküm Africa nung aliba linük, Sudan nung Khristantem reshikangshiba kanga bulua kmogo, ta ashi.
“Onoki tashi angaba, onoki sarasademtsüba aser onoki saru agütsüba sorkar kati lokti nung züngsem kar Khristan asüba ajanga reshikangshiba ya mamangteter,” ta Tiliyan-i ashi.
“Küm aika iba inyakyim nung odar, aser tesüiba küm asem nung amokmeren kanga tali kümogo. Muslim nungertem dang sayutsüngiba agi Arogo aika raksatsüogo, pastor tem puogo aser Evangelists aika amokmerenogo,” ta paisa ashi.
Islam nunger timba aliba linük nung ya taküm Khartoum nungbo Arogo pezü anentsüogo aser sorkari ano Tekülem ki 20 raksatsütsü sentong lir.