Süngkong

– Meren Ex. Pastor Ungma.

Süngkong ya akhidang nungi tsüraburi amshia aruba tongtibang Süngyanglu ka lir, aser Naga kin ajungai ibai amshir. J.P.Mills Ao Nagas page 76 nunga pai iba indang terarateta shia lir, aser pai ashibajia Süngkong tetezü Süng nem kongdaktsüba, Oktempang agia jendang ola tulu adokba ta shia angutsü. Ibai yim kari tulu yangluteter aser kari tila dang yanglur, saka Ao lima nungbo kanga tulu tesa yanglua lir. Saka Yimchung Chang lima nungbo kanga tulubo maka.
Aori kodang yim tasen mesemdir tamasa Süngkongka tama chia, aji tesem tajung ka nung kong nungi aji ajendang ajaki angashitsüsa tekong tajung ka nung yanglua amendaka yurang yimer teinyaktsü inyaka ao. Kechiaser kodang yim ka mesemteta lia odar ta meketa aliba nüburtemi angashidir ajaki iba yimji makdoktsü merang, anungji kodang yim ka kümdir süngkongji tama chia renema ayu, kechiaser iba süngong jagi dang yimer dang arr atokdaki ta arr asangtsü ola ji iba süngkongji liasü. Anungji Kodang putu menden-i Süngkong achitsü lemtetdir tsüdongmen tabensa min tulu kong süng tulu angutsü aji bushii yoktsü, aser aonung Tsüdongmeni süng osangji bener adoka putu pur nem metetdaktsütsü, iba sülen parnoki Tsüdongmen nem shi mayongtsü aser yi tajung bendaktsür ARASENER, TEMEZUNGER dangi yoktsü aser Temezünger jagi Tsüdongmeni ngur adokba süngji Amsü ajanga junger ta shira ano iba sülenji sürabang süngji shibai tama Pu agi lententsü? Aser shibai Puji loktettsü ta temezünger dangjisa asüngdangtsü aser temezünger jagi nisung ana tenüng tuteta ashitsü, anungji aji bener Tsüdongmentemji yimsüsürtem dangi arua iba osangji metetdaktsütsü.

SÜNGKONG ACHITSÜ ATEMA SÜNG ALENI AOBA
Süngji Süngkong achitsü asoshi tetemsü ta arasener jagi kodang shidir, joko yimsüsürtem jagi Süngkong Süngji lenoki aotsü anogo mapang lemtettsü. Aser anogoji lemtetba anepdangji joko Onger kidang metema senteptsü, aser antepong tajung ka, entsüka, aser ak chanuka ta mekang nung sepa ayutsü aser pu, atembang aser lentong, ibaji asa (Special) renema ayutsü aser balaka renema akabatemji amchi agi aleper abentsü, aser ano koba Pu agi süngji tama lendentsü lir, iba Pu jia amchi tajung ka agi aleper iba denji Likok meyi tejongka den ajakji alenteper abentsü, aser parnok ajakji apusua arem jagi aotsü. Aremji tonger tambusangi menden mesemdakji mejemtzü marok nung mejemtzü sünga amer atakatema yiji akatoktsü aser mendenji jungjunga mesema kümtettsü aser Ak, Anji tepseta Diri süngdongzüng nungji tekülemji agütsütsü aser ashitsü, Hahai, meta tsüngrem onoki tanü ne nem iba Ak aser An bentsür aruogo, aser tanü onoki iba sung ya lenoka Süngkong chia tenzüktsü, anungji tanü nungi onok shinga daka metsümetep telidaktsü, aser iba arem ya moajang ta atakatemtsü aser An nungji Ange atsüteta reprangtsü ta kulemer tamasa poknungji soa mayongtsü yanglutsü, Ankela achitsü aser kelen shiba dak Amsü kaoa lir, pai Puji amji agi aleper akabaji bener arua aji salar mezüngbuba süng nungji lendentsü. Iba mapang nungji süngdong nung jagi sungu tu tsük metsük aji reprangtsü, kar danga tsükra idakji alir kar arishi malangtsü ta takzü. Iba sülenji Amsü nung atoka aliba nisungji arutsü aser süng nung jangoka akaba Puji pai loktettsü, anungji item nisung ana nem ji yimteni naroka tajung agütsütsü aser par semchirtemi LENDENER aser PULOKTETBA tasa aja. Iba sülen joko tanubor melentepa süngji melao tashi atsüngtsü. Aser kodang süngji laodir idakji alir ajak tesüngmangtsü washia ola agütsütsü aser mezüng lendenba puji amji agi aleper rizünga ayutsü. Iba anogo nung Süngkongji lenteta yur taor ajak washia ola agütsür yimdaki adoktsü aser Onger aser Tatartemi pungmang takzüa mejangtsü.
Süngkongji renema yim matong tashi yimer ajak süngkhum shibanga anempongtsü, ainer manikettsü aser züngazünga lemsar kari tekolak, kari temang aser kari tepen ta noksa teperi enoka yanglutsü. Aser Arasentsür ajanga Süngkongji tenüng shiba ajatsü aji Amsü nung temezünger jagi ashitsü.
Tebur sürabang Rarenbenba aser tetsür sürabang Rarenbenla ta ajatsü. Aser koba anogo nungi aji atsü mesotsü anogoji lemteta ayutsü aser maparen ajak dak ta renema, lenmang ajak kanga junga pitoka renemtsü aser Tembang menungtsü süng tulu lena lenmang nung renema ayutsü aser süngzü teperi atena ibaji sendaka yur Tir kati mejemtsü akatoka atakatema ashitsü, Rarenbenba mesüra Rarenbenla, na iba meta toktsür ozü yimkongi temoatsü bentsür jua adokangni ta mejemtsüji shilokja atakatemtsü aser iba sülenji ola tulu agüja ayimoktsütsü, idangji Süngkong tekolak aser tekong ajak nung süngzü sendaka akabaji zünga zünga süngzü nungji ammeter hoi hoi ta atsü mesotsü. Aser Süngkong kolak nungji nokinketer sobutsü teperi sobur tua nokdaktsü aser ola agüja nüpurtemjia ajungmesoa süngkongji atsü mesotsü. Aser kodang yim tonga atsür adokdir tananü yimer ajak among monga Süngkongji külema waloktsü. Aser joko mapang mapang shia Süngkongji waloka külemtsü aser Süngkong walokshia mangku bushi-i aotsü aser mangku tajem bener arua aji Süngkong kolak nung amendaka yur teburtem pei pei tata sobutsü sobur süngkong meketa nokdaker nisung shia Oktembang kaka amer pa mesüra laji meketa nokdaka atatsü aser kodang Tiri Antipongji atakatema walokdir ororua tena süngkongji terem terem ta ajena longsuteptsü, aser Tiri kodang Antipongji atakatemdir nok agi An kongji tesadang ka wadangtsütsu aser telok meketa nokdaktena alidakji chioktsü aser idangji Anji tekong tesadangka wadanger alinungji ateptena telok meketa alidakji pungtentsü, idangji telokji pelatepba reprangtsü aser kodang jungjunga südir Antipongji bener arua telang nungi Angi atsüteta aji repranger yoka agi walem jungjunga mita ajuajua nar akaba nungji telang nungi toketa yokbaji tebanglen ateta tor tekong nungji Angiji nailotsür Süngkong kolak nungji araloka yutsütsü aser idangji Arju nungri ozü taküm pua akabajia külemi tepseta an dakjisa tokloka yutsütsü ta yamaji tsüraburi Songkongji waloka benshia aru.
Akhidang tsürabur putu nung Yihova Tsüngrem memetet dang parnoki ajuruba ajak külema aru, Tzü külem, Süng külem, Tekong külem, Meta tamajung külem, Yim külem, Alu külem, Tsükjen külem, Nisung kolak walok, Sü kolak walok, Süngkong walok. Yamaji tapu mina külema aru, item ajak rongnung süngyanglu tulutibaji Süngkongji lir. Aser pa walokdangbo nisung kolak aser ozü taküm agi tang waloka aru. Kechiaser iba sungdong meta nung taküm ali dang Tenem kosungtema item süngjang chia peletepba aruba agi pa walok dangbo Ozü taküm pua waloka aru.
Kodang asenok Khrista dangi meyipba Yihova Tsüngrem shidakba Teyanglurji meteta Pa dak amangtsü tenzük, iba mapang nung jagi item tekülem ajakji endoker tamang agi taküm alitsü tenzükogo.
Anitet 20:4 Tsüngrem O-i ashir:-Temalen anüng, mesüra telonglen ali, mesüra ali teküpboklen tzü nung aliba mesüka kecha na atema SUNGYANGLU teyanglu, nai parnok madang tapudak mesüra parnok tekülem, kechiaser Kü dang sempaba tsürabur temenen yong par chirnurtem putu asem pezü merenshitsü.
Isa 44:9 Süngyanglu noksa yanglurtem parnok ajak amajok lir, kechiaser süngyanglu yanglur ajak mak-asütsü aser item süngyanglu yangluba den shibasa dena lir ajak maksüdaktsütsu.
Anungji temeimba Aoli Arogo purtem, Naga nungertemi külemba SUNGYANGLU tulutibaji SUNGKONG ya lir, anungji shirnokisa iba süngyanglu dangi meyiper KIBUBAI parnokji maksüdaktsütsü ta shiogo. Asenoki mebilemdanger ashi, par yimer, par yimer ta jembitsü kecha mali, mesüra pa pa ta jembitsü kecha mali, saka süngkong dangi meyiper aika maksü ajuruogo, anungji Aoli Arogo purtemi tanaben tsüraburi walokba Süngkong süngyanglu dangi maotsü ayongzüker, saka tenarong metsüa shirnoki yangludir yangluaka Arogobo item nung jagi pila liang ta mepishir. Kechiaser Yihova Tsüngremji Süngkong masü, anungji Süngkong tsüngdang shirnoki sarasademer Yihova Tsüngremi kanga mepelatsü aser Pai ashitsü ” NI SUNGKONG ASU ? “