Sushma-i tasüngdangba langzüba sülen senden katettsü: Rahul

New Delhi, August 10 (Agencies): Hombar nü Congress tatong Tir Rahul Gandhi-i, External affair minister Sushma Swaraj-i lar kibong Lalit Modi den senotsü belentepba osang metetdaktsüba sülen ang Congress-i Parliament senden akatsü melatsü, ta ashiba den külemi Ato kilonser Narendra Modi-i Madhya Pradesh aser Rajasthan chief minster nati temzüng alema inyakba nungbo ola madoker saka dena tenüng sangogo, ta aitsüogo.

Rahul-isa, Swaraj ji miimshia inyakba nisung ka aser temzüng alema inyaker Lalit Modi yarir ka ta aija la dang, taoba IPL Tongti Lalit Modi ket nungi lar kibong bank account nung sen kwi angu’ar linük nem metetdaktsütsüla, ta ashi.

“Parliament senden ji akatsüla ta onokia bilemer. Ajisüaka onoki nüngdakba onük ka benokogo. Onoki aser ni iba ya asemben jembiogo- Sushma Swaraj, Rajasthan chief minister aser Madhya Pradesh Chief minister nungeri ken o kar nung temzüng alema inyakogo. Madhya Pradesh nung nisung tepsetba maparen atalokdagi aser iba tatalokba nung jembitsüji nüngdak madoker, ta asen Ato kilonseri bilemer,” ta Rahul-i ashi.

“Pai chief minister tem tenüng asanger. Par (Modi’er) chief minister ajanga Madhya Pradesh nung lanur merirjang aika teimla samatsüogo ta asüba atangji ji pai sentoker. Temzüng alema inyaker ka aser Rajasthan nung par chief minister na tsüngda shishilembabaren nung tesentaktep alibaji pai khenyongi sentoker,” ta paisa ashi.

Deobar nü Bihar, Gaya nung election nüboyim sentong ka nung Modi-i, BJP chief minister tem yimsüsüba kübok Madhya Pradesh aser Rajasthan na BIMARU category nungi adoktetogo aser terenlok lenmang nung kanga kara jajadagi, ta jembia liasü.

Swaraj aitsüba olen ka nung Rahul-i, “Parliament nung lai, Lalit Modi dang koda temeim mapa sayutsü, iba indangji junga jembibaji tanganütsü ka liasü,” ta ashi.

“Nai temeim mapa inyakner, (süra) kechiba miimshia inyaker. Kechiba miimshir, kechiba ner ministry dang mashi, nai ibaji inyaker ta kechiba linük dang mashi,” ta Rahul-isa ashi.

Swaraj aser Lalit Modi na tsüngda senotsü belentepogo ta aija Rahul-i, “Lalit Modi indang sen kwi nü bank account aser ner kibong bank account-i ait’ar yimlibilema linük aser India nüburtem dang shiang. Yimlibilema ibaji langzüang aser Parliament senden kadakjang,” ta ashi.