Talangi Atuba

“Aser pai ni Tanela nung tenem tulu talang kati anir atu…” J.Adok 21:10
Iba ama mapang nung asenoki tebilemba balala aika adoker. Alima nung mapa tulu adoka temelenshi adoker. Kijaji kodanga yareta makümer. Aji oda liaka mapang ajak nung tebilemtsü tulutibaji kija takümji lir. Iba dang tali ajak metetsang kodaker Tebui nisung ka kisüng yimsüsür inyakba ama telok dak meinyaker. Meimchir Tsüngrem mesükba nung yanglu nungji, petinu tulutibajia meimchir dang nungi tilaba lir. Ajemalutiba tamanger kajia orion aser pleaides yanglusang senti züi Kalvary kangki nung alizük nung pa/laji senti lir! Teti dang repranga aliba Tsüngrem tenükji kija taküm shia repranga nüka lir ta tangatetba asenoki iba küm tasen tenzükdi.
Khristan ka ama tanü tensa terenlok ajak asenoki tenem kolak nungi reprangtsüla. Asenoki temejungket nung noktak nung dang talang nung aliba angutsü. Ali telemok nung mener alima tebur tajungji mangutsü. Ajungket nung mangdang angur. Asenoki lenden tuluba aser metong talangba ngunera asenok tenem temejong nung noktaktsüla. Yohan dang tasen Yirusalem sayutsü atema Pa tenem tulu aser talang kati anir atu. Ibai masüdang Pa tzüyim küm nung nokdaker tzüyim tarok nungji adokba shiruru ngua liasü (J.ADOK 13:1). Tanüa asenoki tawa- tanü lima nungji adokba shiruru aika angur, aser ishikatidang “Tasen Yirusalemji” anüng nungi aluba angur! Aika teküpboklen tzüyim kümbang nung alir. Idakji tepuatsü aika dang lir. Idakji TV aser radio nung inyakertem alitsü. Anungji idakji anogo shia osang kaket adoker. Magazine tem adoker. Idakji lemang nung sensakasemba aser business alitsü.
Khristar nübur alima tzüyim jenjanga nung alitsüba kodanga masü. Asenoki tenem kolakji repranga, shidakba tangatetba nung rangloktsüla, shidakba tangatetba bushitsüla. Asenok tensa tatalokbatemji ain kar shin o den medemdanga, tanela Temeshi tenük ajanga, Tsüngremer nükjidong aser Khristai tatem nung takok anguba nung rangloker angatettsüla. Asen mapang nung tzüyim nungi adokba shirurutem jaki memeteti ” Tasen Yirusalem” asoshi terenemba akar. Tatemsa Kibubai takok angutsüba kuli asür.
Saka asenoki anogo shia taküm nung iba mangdangji koda ayutsü? Asenoki Laishiba anasa alitsüla. Asenoki Tanela jashidaktsüba mapa, aser telung nung pa kuli asüba anema kümdangtsüla. Tanela Temeshi dak metaloker asenoki küm tasen terenemba lemtettsüla.
Asenoki küm tasen nung item tezüngzüktepba Kibuba den yanglura iba tetezü mejembitetba temoatsütem angutsü. Ni anogo shia sarasadem nung minute semer dak tajemba magütsütsü. Ni hopta shia nisung ka dangbosa Kibuba indang kuli asütsü. Ni anogo shia Tejen aser Tasen Lai nungi maneni azüngtsü. Ni kü taküm nung Yisu melen kecha lemang meshimtsü. Asenoki iba ama küm tepiyong lira, iba jaki tesünep teimla kuli asütsü.