Taluposa Yur Anüngapongba Lima

– T. Nükshi Yaden.

Ya kü tangatetba yari lemsateper dang ashi, ano ni angatetba ya mashikoshi asütsüa akok saka asenok ajak tebilemba lemsateptsü temeten ali nung aji oda lemsateper.
Tawa tanü osangkaket balala ajanga angazükba joko sorkar aser nija school tem ajak nung tanur dang sayutsü training magir tesayurtem March 2019 tashi nung mapa nungi anentsütsü ta sangdongogo. Aji oda Nagaland sorkari tesayur shimdang item training agir alir nem tama maongka agütsütsü ta renama lir saka aji ta meinyaki ketdangsertemi parnok ajung asa-a inyakba ajanga tanü iba tia ya ajurur südi. Iba sentong meyangludang mapai ayirtem alitsü, saka tawa tanü tena meteta item training agirtem jenti lir aser interview agütsür sür nung training magirtemang shimba aiben atalokogo aser aika shimer kulenang training agilen senzüli ta arur. Aji dang masü sorkar school aika nung tesayur tali lir ano kar nungbo peria mali. Pei linüdak linüba tesem bushia with post transfer aoba temelen maruba tesem aika nung alitsü südi. Ano tangar züngpeter alir temelen yutsüba ibala tim mesüi inyakba aika ajiteter. Education Minister-i ashiba agi, education directorate nung tesayur 74 attached süa lir, aser ano District aser Sub-Division tem nunga yamaji attached süa lir ta ashiba ya shitak süra tesayurji tanur dang lesson sayutsü shim masü na ta bilemer, aser iba ama inyakba ajanga school kar nungbo tesayur agi kanga anüngapong alitsü südi.
Ano maneni August 10, 2017 osangkaket balala nung ashiba ama August 8 tashi GPS tesayur 1685 tashi show cause notice govt. of Nagaland Directorate of School Education-i agüjaka kecha osang maliba ya tesüngmangtsüka lir. Item tesayurtem ya nisungbo mali sürnung ita sen agir asü ta tebilemdangtsü aika adoker. Tangarbo Delhi nung nija school 499 nung fee tali agiba atema sorkar-i tasüngdangba akar ta angazüker. Süra Nagaland nunga nija-i lapokba school tem fees atema lemteta yuja kecha talenba lir asü mali, aser mali nunga ya khen süoki ia bilemdangtsü lir asü ta bilemer aser aji mesüra pei sünütsü süa parnok ajangzük asa-a kecha talenba makai doktsüra tsüraburtem kanga akoksatsü.
Ano kulen sorkar mozüki tem reprangdangra teperiba kecha mali community/ primary health centre tem jenti lapoka lir saka Doctor mali. PHC kar nung Doctor hopta nung kenü mesüra ananü ta aruba lir, kar nungbo hopta piyong marubaa lir. Doctor kodang arutsüar memetet ta asüba tashi lir. Süra Doctor maliba mozükiji kecha nüngdak madoker. Saka Medical Directorate aser District Medical office tem jagi odangra office nung name plate-ji reprangyonga ora Doctor zünger mezüngma mentepa lir. Khen bilemtsübo parnokji shiranger reprangtsü Doctor azüng sür nung kechiba office tem nungang amener. Item office mapa yabo tangaria inyaktettsü sür nung tasa bilemer.
Ano aji dang masü asenok Naga nunger aika Engineer-bo azüng mapabo mashi, Computer agi saka mamshiteter, I.T.I Certificate bo lir saka mapa mashi ta sorkar office balala nung aiben ajurur. Saka item ama kasa zünger kanga junga inyakteter, meteter jenti mapa mangur nemzüdar. Item ajak ya sorkari mapa nung aniokdang tim masüba len nungi inyakba ajanga asütsü.
Ano kulen reprangdangra Naga nunger Theologian aika pai nangzüka aser azüngba den mesütepi inyaka jajar aika lir. Kar politics asayaa senzür lir, minister sülen tapu tapu purapujia jembia senzür aika Theology azüngji ojia parnokisa tajungba jembiteter. Ano karbo sorkar office nung itasen tajung chia tiyazü mapa aika inyakya alitsü. Ano ochimashi shishilembar rongnunga densema aika jajadar. India tesem balala nung private sector palala nung jenti inyakdar. Nagaland nungi Missionary meyirjang ter yoktsüpur to itemji masü na? Nagaland nung Arogo aika nung Pastor, Asso. Pastor, Youth Director, Music Director bushir saka mangur, koda asü ta asadangra Theology zünger alirtem aika lir saka pei linüba tesem nung mesüra meinyakner. Saka Dimapur, Kohima aser Arogo takar facilities peria aliba tesemtem nung alitsüba asameyanger. Saka Tsüngrem tenzüktsü azüngertemi kongi yokdir menungnangi yangji oa tenzüktsüla.
Nagaland Dry State-bo sangdonga ayu, saka yibo gari lenmang malidak tetsüng agi senzüba tesem nung dena yi talubosa angur. Ano tang clean election atema anogo shia ayimtener, Nisung tajung ochishirang election-i yoktsüla ta ayimtener. Saka service tepiyong tim masüba rongsen bendena ayuba aser tim masüba inyakyim tapu balala nungi bendena yur, ni sen aika lir, ni election nung tokteptsü, nenoki sen kwi aginür ni agütsütsü ta aika adokdar. Clean election-jibo shinga-ia nokdangtsü makok, anungji asen yimer ka liaka ano nia aitsü adi ta yimdak yimkong nung rongrong atener. Iba clean election ya-a Dry State ayimoktsüba ama mesülima ? ta tebilemtsü kar arur.
Anungji Naga lima jungdi ta bilemra item ajunga nung tebilemdangtsü aser item yabo melenshi nungang jungdisü ta kü tangatetba yari lemsateper.