Tamakok mapang teyari

Asenok mapa nung tamakok anguba mapang asenoki aiben Tsüngremia meyarir amai tezüdanga bilemtsüa akok mesüra Tsüngremi asenok tamakok tia nung alibaji mangur amai bilemtsüa akok, saka asen tamakok anguba tiaji Yisui angur. Pai asen takok aser tamakok anguba tensa tia ajakji meteta lir. Asenok tamakok tia nung alidang yaritsüba lenmangji nisungibo memetettsü saka Yisuibo meteta dang lir. Ashiko, asenok tamakok tia ka ajurur aliba mapangang ka asenoki Yisuji asangsang nung ajurutsüa akok. Peter-ia pa mapa nung tamakok aser takoksa ngur aliba mapangang ka Yisu ajuru. Asen tamakok mapang Yisui odang yutsür maor saka Pai asen den yarisema tamakok nungi takok tulu ngudaktsür. Amang piyong ayong sema zütsük ona senzür kecha mapu tezüdanga anibelemer aliba mapang ka Peteri Yisu ajuru. Peter ya ango pur liasü. Tetezü pa mapa ajunga agi ango aputsübaji dang liasü. Iba ama ango aputsü nung mongin nisung ka amang piyong zütsük ona jajar, ango ka dang mapubaji taküm nung tamakok anguba dang nungi tuluba tazüya mapang ka tenjiba liasü ta asenoki bilemtsüa akok. Tazüya tetezü nisung dak nungi temoatsü samaba mapang lir. Tazüya nisungi kodanga pei mapa nung takok mangutsü aser pei adenba telok dena menentsütsü. Iba ama tezüdangtsü, tazüya aser tamakok mapang ka Yisui Peter ajurutsü renema liasü. Aji oda, iba ama pei mapa nung tamakok ngur aliba nisungang ka Yisui Pa nütsüng asütsü shimtetter liasü. Kodang Yisui Peter tamakok tia anung aliba angu, Pai pa nem takok agütsünü. Aonung piyong amajok nung zütsük ona senzübaji Yisui meteta dang liasü. Kodang Peteri Yisu dang aonung piyong zütsük ona senzüaka ango kata mapu ta ashi, Yisui pa dang ibaji kecha masü, tang nungi nai iba mapaji toktsür kü sülen anidakang ta tamasayongi shinütsüka saka Yisui Peter dang tamasa ango kong lir aser itemji koma aputsü ibaji sayu. Yisui Peter shisatsü nung Pa dak temulung lemtetba aser tashi angaba ali asü mali, ibaji metetnüa liasü südi, mesüra Peter dang Pa dak aliba ain jungkai adoka tama sayunü südi. Koba mapa nung aser koba ama tensa tia nung asenok lidir liaka, Yisui asenok nem Pai ashiba angadaktsüner. Yisu sülen anidaktsübaji asenok taküm meshitettsüba tama masü saka tashi angatsüba tama arur. Pa dang tashi anga nung dang asenok taküm meshitettsü aser tazüya taküm to agi temoatsü taküm kümadoktsü. Kodang asenoki Yisui ashiba angadir, tamakok anogo agi takok melentsütsü. Peter tamakok aser takoksa nung tezüdanga alidang, Yisui Peter dang tzü tarok leni orr zütsük ondaktsütsü ashi, idangji Peteri ashi, ” Kibuba ammang piyong onok zütsük ona senzüogo saka kecha mapu saka nai ashiba ama ni zütsük ya ondi,” ta ashiba Luke 5:5 nung tatalokba ka angur. “Nai ashiba ama, ni inyakdi,” ta asüba o ji  Yisui aginüa liasü. Aji oda, Peteri zütsükji ondaktsü aser ango jenti apu. Asenok tamakok angubaji asenoki jungjunga bilemdangra, asenoki Tsüngrem dak masü asenoksasa asenok dak temulung lemer inyakba agi asütsüa akok. Asenok tamakok angubaji asenoki Tsüngrem den tesendaktep mayuba agi mesüra Tsüngrem dang asüngdanger meinyakba agi mesüra Tsüngremi ashi mangaba agi asütsüa akok. Ajisüaka, Tsüngremibo asenok tamakok angudak nung jagi takok ngudaktsüner. Aji oda, na tang tamakok tia nung lira, Tsüngrem dang-dang nü tamakokji shiang. Nai Tsüngrem dang ni küsasa kanga merangogo saka makoker ta shiang. Idangji, Pai nü dang kong kechi inyaktsü ibaji nü mulung nung jembitsü. Na tezüdanga teli, kechiyong kodang nai Yisui ashi angadir, nü ket aser nü kolok agi nai mamangtsüsa mapa tulu inyaktsü aser takok tulu angutsü. Ibaji, nü taküm nung nü kija merangdangba o Yisu tashi nung inyakba na tetsüngdaji asütsü. Na tamakok tia nung lira, ibaji nü taküm nung Tsüngremi mapa inyaktsüba mapang ta nai metetang aser Tsüngremi kechi shidir tashi angaa inyaktsü renema ataang.