Tangar dang tatok agütsütsü mera

‘Takuba ajak, ain adokba aser terasaba, rongrongba, sensatsüba aser sempaba ajak nenok temulung nungi piladakjang. Aser kati ka den meimtepa jungtepa liang. Aser kechi koda Tsüngremi Khrista nung nenok tai atok, yamaji nenokia kati ka dang tai toktepang.’ Efesa 4: 31-32.
Laishibai tangar dang tatok agütsutsü asoshi jangja jangja-a ashir. ‘ adianutem, nisung ka langka tai nung pura, pamok shir tanela takum jenjang nung lir, nenoki iba nisungji ajemaluba tanela nung melenshidakjangma’. Anungji tangar dang tai tatok agütsüba asenok dang nungi Tsüngremi yimlar.
Nisung shinga tabensaba mali ta metedi. Kodang asenoki nisung kar sempa-a reprangdir aser nisung ka anema asen mulungjang nung yirua tatok magütsuteti lidir aiben palla anema meshimujungi benshir alir. Saka asenok ajak rong ka nung dang lir. Sayutsüngir 7 :20 nung ashir, ‘Atangji alima nung temeshipuri tajung inyakaka pai temenen mebenshiba nisung kata mali.
Na temeten liaka nai mang ayangtsu temerang aser aji tatok agütsüba teyongtsuji lir. Rom 12 nung ashir ,’Nenok sasa mang teyang; saka Tsüngrem nem dokjang….. Kibubai ashir mangyangba kü meyong, ni shia agütsütsu.’
Nai tamajungba dang tajung agi langzükang koba tetezü na anema inyakba nisung dang kecha sota meyui sazüka yutsüba. Na anema inyaba nisung dak mejungi ranglokba nungi ne taküm asoshi Tsüngremer sentong kechi lir iba nungji ranglokang.
Sarasadem : Kibuba, Nai melaba ozüng benshitsu asoshi ni ne dak tali rangloker. Amen.