Tanutem peladaktsütsü asoshi film yangluner: Irrfan Khan

Mumbai, September 22 (Agencies): Actor Irrfan Khan-i ashiba agi, pai tanurtem indang film ka nung shilem agia cinema ajanga temeim otsü balaka ajangshiner.
Pai, Paan Singh Tomar, Talvar, Maqbool, aser 7 Khoon Maaf nunger film nung shilem tajung agiba ajanga Hindi cinema nung ajaki meteta aküm, aser iba sülen pa bendanger film tem nunga shilem tajung agia arudar.
Tang tashi nung Irrfan-i bendanger film, The Namesake, Life of Pi, A Mighty Heart, Slumdog Millionaire, The Amazing Spider-Man aser Inferno nung shilem agiogo aser iba ya India nung Sony PIX nung September 24 nü sayutsü.
“Ni Jurassic World film amala nung shilem agia tanurtem peladaktsüner. Ni tanurtem anioka shilem aginür. Ni temeim indang film tem nung shilem aginür, koba ni piku aser The Lunchbox film nung maongka ngua agiogo. Ni temeimteper otsü balaka nung shilem agia tajangshiba balaka kaner,” ta Irrfan-i Singapore nung ‘Infernoin’ film ajungketba mapang ashi.
“Ni shilem aginüa bilemba shilem kar lir. Item rongnung shidakba nisung taküm otsü tatalokba indang jilushitsüba yaa ka lir, saka ni shiba indang shilem aginüra ajibo mashitsü,” ta pai ashi. Paisa ashiba agi, India nung horror cinema aser political cinema mali.
Irrfan tawa Hollywood actor Tom Hanks den Oscar-ngur aliba director Ron Howard indang film Inferno nung külemi shilem agiogo.
Film indang jembidang Irrfan-i ashiba agi, “Tom Hanks aser Ron Howard nunger amaladen shilem agibaji kenyongi tajangshiba balaka liasü.”