TASHI ANGABA

Saka Peter aser tenyartemi langzüa ashi, “Onoki nisung dang nungi Tsüngrem dangang tashi angatsü.” T. Mapa 5:29.
Arogoji aintsü tenzük – meyi asem Pentecost anogo nung renlok (T. Mapa 2:41). Ano meyi pungu tesülen renlok (T. Mapa 4:4). Saka idakji timtem ka liasü aser ibaji Peter tepuokdak aliba mapang liasü.Tepuokdak nungi chioker külen Peteri maneni Khristai melaba mapa inyak: “Kü santem mesüang.” Iba yagi yimti nung timtem tulu adok aser yimsüsür temi kechi inyaktsü memetetti liasü. Parnoki mapang shia Peter tepuokdak puok saka ozüng raksaa mali nung parnoki pa chiok saka Yisu tenüng nung sayuba anentsü ozüng agütsü. Peter aser tenyartemi parnoki anentsü makok ta langzü. Parnoki Tsüngrem dang tashi angatsüla. Tejak dak Yisu tasü nungi shia maruba mapa Yisui oar sayutsü parnok nem ozüng agütsü (Mathi 28:18-20).Parnoki nisung dang nungi Tsüngrem dang tashi anga.
Khristan ka ama asenoki Yisu kibur ta agizük (Rom 10:9). Anungji asenoki Pa dang tashi angatsüla. Pai nütsüngtem dang tasüngdangba tasak ka asüngdang. Pai tanüa tasüngdangba asüngdanger – “Nenoki kechiba Kü dang Kibuba, Kibuba ta ajar aser Ni ashibabo meinyaker?” (Luke 6:46). Rom 13 nung asenoki sorkar ozüng tashi angatsüla ta ashir saka kodang item ozüngtemji Tsüngremi ashiba den meputeplir, idangji asenoki Tsüngrem dang tashi angatsüla. Tashi angabaji yimten yimsüsübai aginüba ama mesülir, tashi angarji tepuokdak nunga ayutsü akok. Khrista tangar den lemsateptsübaji yimsüsüba den mapet ta bilemra Khristai ashiba tashi angartem tepuokdak ayutsü aser rishikangshitsü akok. Saka bilemtetang, “Asenoki nisung dang nungi Tsüngrem dang tashi angatsüla. Oang aser sayuang.
“Kibuba, Ne O tejangja asoshi Ne tenüng asanger aser iba yagi kü dangi timtem arudakjaaka ni iba nung tamang kateta alitsü yariang. Amen.