Temang seret tali kümdaktsüba ajanga cancer 13 tashi adokdaktsür

Bushisüngdang tasen ka ajanga ngutetba agi, temang seret tali kümdaktsüba ajanga, ‘pancreas’ aser ‘esophagus’ cancer dena tanga cancer tapu 13 tashi adokdaktsür, kechiyong temo ‘cell’ tem ajanga temang nung cancer cell ainba nokdangba inyakyim nung timtem agütsür.
Temang nung temo tali aliba ajanga temo cell temi ‘hormones’ aser ‘proteins’ adokdaktsür, ta United Kingdom’s Imperial College-i bushisüngdangba nung ngutet.
Azü jajaba lenmang nung dang masü saka iba ya temang sünga akümer aser iba ajanga cancer tapu aika adoktsüba lendongi idaktsür.
World Health Organisation (WHO) ajanga ashiba agi, alima nung nisung tain billion 1.9 temang seret tali mesüra teyira lir aser iba ya cancer tapu 13 den sendaktepa lir. Temang seret tali kümdaktsüba tebilemtsü ya temang atema lendong lir.
Temang seret tali kümdaktsüba dak sendakba nung sendakba cancer 13 rongnung; oesophageal (food pipe), pancreatic, temesen, tepok, colon & rectum, tasü, tepokpok, tezüng aser gynaecological cancer densema lir. Maneni tetsürtem dak iba ajanga mama, ovary mesüra uterus cancer adoktsü akok.
“Kanga dang bulua adokba cancer rongnung mama aser colon densema lir aser anepalutsü asoshi tasak rongnung pancreatic, oesophageal aser tasü cancer lir,” ta bushisüngdang ajanga metetdaktsü.
Iba bushisüngdang nung pusema BLK Super Speciality Hospital nung Bariatric & Gastrointestinal Oncology Surgery Director Deep Goel-i ashiba agi, teyira nisungtem dak cancer adoktsüba aser iba ajanga asütsüba lendong tuluba lir.
“Temang seret shidak dang aliba nisung ka aser temang seret tali asüba nisung ka ta pancreatic cancer stage kasa agi tonger putet nung, temang seret tali alir tem asütsü asoshi lendong tuluba lir,” ta Goyal-isa ashi.
Temang nung ‘insule’ indang tongtibang indang rasaa ashidang Goyal-i yamai ashi, “Kodang nisung ka temang tali ulua kümdir, temang nung insulin jenjang tali akümer aser iba ajanga cancer cell ainba nung teyari agütsür. Maneni temang nung temo atsüngdenba ajanga ‘sex hormones’; ‘oestrogen’ aser ‘testosterone’ jenjang melenshidaktsür, koba ajanga ano cancer adoktsüba lendong tali kümdaktsür.”
(Source-Internet)