Tensa azüokang mesüra police tashi onok nem agüjang: Kejriwal

Delhi, July 18 (Agencies): Honibar nü Delhi Chief minister Arvind Kejriwal-i, Delhi nung tensa tamajungba kümogo ta ashiba den külemi Delhi Police ya state sorkar kübok inyaktsü asoshi takhangba agütsüogo.
Linük yimtiba Delhi, Anand Parbat kiyong nung aiür ka tsüngsetba sülen Kejriwal-i lar kibong semdangogo aser iba dak sentakba nung osangbenertem den jembidang Kejriwal-i, “Delhi Police ya Ato kilonser kübok aiter. Ato kilonseri mapang agütsütetta Delhi nung tensa azüoktsüla, aji oda mesütetra pai Delhi police ya onok nem agütsütsüla, ibaji ajanga onoki tensa azüoktsü,” ta ashi.
“Iba tatalokba ya taoksatsüka lir. Teburtemi mesüshiba lai ashishiba ajanga oset techira agi la dak aiben atsüng. (Aser) Kenü anogobo teburtem jagi tetsürlaji tepset,” ta Kejriwal-i ashi.
AAP tongti aser chief minister-isa, tetsürla tepsetba ken o jembitsü asoshi pai Hombar nü Delhi Police commissioner BS Bassi jaoka lir, ta metetdaktsü.
“Iba atema magisterial bushisüngdang ka onoki tuyuogo. Iba ken o nung Delhi law minister-i Delhi Police dang nungi osang meshiogo,” ta pai ashi.
“Delhi Police-i MLA tem dang telangzüba magütsütetra, kodaser temzüng ozüng indang inyaktettsü,” ta pai ashi.
Delhi sorkari arishi küm 19 tetsürlar kinünger nem senotsü teyari lakh 5 agütsütsü sangdongogo.
Brihostibar aonung Delhi yimti tiyong nung shishilembaba tesem ka nung nisung kati arishi küm 19 Meenakshi dak oset techira agi tsünga tepset. Tebur sang jagi la sülen anishiba ajanga lai ken o agütsüba sülen tamalen tebursangji tepoukdaki yoka liasü.