Tepo kümtepba anentsüla

Tanü Naga nunger loktiliba nungi ochimashi agientsüla, ozüng alema inyaksangshibatem nokdangtsüla mesüra tamajungertembo tuteta yimjak nung merenshitsüla, maaksütsütsüla ta kinük kisang ajaklen jembiteper. Tsüraburtem nungi tenzüker, lanur aser khenkhenbo tila tanurtemia Nagaland majungba aser teraksa indang jembiba asenoki anogoshia angashir. Khristar arogo tera yanga aliba lima ka nung iba ama temenen mapa inyaktepba ya majung ta tangatetba nung kija aser telok balalai ochimashi anema mapa inyaka arudar. Naga lima akongba, Naga lima raksaba, Naga lima nung terenlok maliba, Naga lima nung nübortem kangshiba atema tai tongloktsüdak aika lir saka item rongnung tongtibaji sorkar aser sorkar ketdangsübaren nung lir. Iba jagi ochimashi anema noktakba aser inyakba kija mesüra teloktemi aiben sorkar yimsüsürtem aser sorkar mapa inyakertem dak tenük yoka mapa inyaktsüsa akümer aser inyakyim melenshitsü atema ola agüja mapa balala inyakdanga arudar. Ajisüaka, pei pei akokba tashi inyakyim melenshidi ta sür mapa inyaktepa arudang kija aser teloktemi aiben tetsükdaktsü ajuruba asenoki angur aser angashir. Tetsükdaktsütem rongnung kin, yimtsüng, senso tenüng nung tepoküma noktakba aser yariba ya ka lir. Sorkar yimsüsürtem aser mapa inyakertem nungi shir kecha masüba nisung ka jia pei kin/yimtsüng nung züngsema aliba senso ka lir aser ibaji asen Naga nunger sobaliba tajungtem rongnung ka lir. Tepela aser tejashi mapang ajurudang, tangar dang nungi tamasa yimertemi/kini pei senso den tongteper aser yariteper, tenüngsang agütsüteper. Iba sobalibaji kanga dang tajung aser mesamadaktsüi metsünga reta amshitsüla, saka tekümdangtsü kaji asenoki iba ya mashilen mesüra tim masübalen mamshitsüla. Aiben Nagaland nung ken o tem adoka jembidang, ozü yimer, ozü senso tajung ta tenüng amer yimer/kin tsüngda tepokümteper aser iba jagi tetsükdaktsü ang bener arutsür. Ochimashir mesüra aibelenertembo pusema menungittsüla aser meyaritsüla sernung aiben asen Naga nungertemi meshitaka mesüra majunga ta metetsümonga pei kin/yimer pusema nungitba/yariba angur. Sorkar ketdangsübaren nung ochimashiji odang nung adoker masü saka nisung ka mesüra kari mapa meshitaki inyakba mesüra tim mesüi inyakba ajanga dang adoker. Anungji, iba nisung/nisungtem tuteta merenshitsübaji tim dang aser ibaji ozüngia melar. Nagaland sorkar nung tekolakba chief minister-i anir menden kecha mataba MLA, sorkar department nung Director nungi shir ki aoker, ajaki sorkar ketdangsübaren nung dena lir aser parnok ajakji pei pei jenjang nung sorkar ketdangsübaren nung shilem ka ka lir. Anungji, ochimashi anema mapa inyakdang parnok rongnung kar dak tai tongloktsütsü mesüra parnok tenüng amshia ken o bushitsüsa akümtsü, anungji iba amala mapang ajurudang ozü kin, ozü yimer, ozü senso tajung ka tepo mekümi, ochimashi anema nokdakertem aser ozüng amertemi tetsükdaktsü kecha melii ochi obendang agütsütettsüsa tenokdangba kecha magütsüli. Yamaji süra, asen loktiliba nungi ochimashiji tera nung atsüdoktettsü aser asen Naga lima jenjang tajungba akümtsü.