Teti adenba

“Ajiang, alima matem tashi ni nenok den teti dena lir.”
Kibuba shia aruba aser kotaki atuba tetsüngda anogo lir tashi liasü. “Kuli jenti agi peisasa parnok dang taküm sayu” – T.M.:1:3. Item anogo lir nütsüngtem den alidang Kibubai tesem ka nung dang nütsüngtem den ali masü, yimya aser mapang balala nung parnok den ajurutepa jembia liasü. Parnok dangi aoksa adoker Pai parnok jembiba ajak angashiba shia liasü. Pa tenüki monguaka Thomai jembiba Pai angashiba ashi. Item anogo lir tatem nung Pai tenangzükba tejangja agütsü, “Ajiang, alima matem tashi ni nenok den teti dena lir.”
Item mezüng nütsüngtemi parnok tenüki Kibuba monguaka Pa parnok den dena lir ta tangazükba tulu angazük; kasa lessonji nai aser ni angazüker asü masü? Kibuba shia aruba ajanga item tashi mait aser tasü mait nütsüngtem tasü tait aser tashi tait melenshi ta asenoki aiben angashia arur. Saka ochiji ibaji dang masü. Parnok tepela, mainshi aliba, Khristai kümzükba ain metsübui kuliji mapa pungu ka nung dang adokdaktsüba liasü; mezüngbuba, Pa atangji shia aru; tanabuba, Pai kotak chuba menden nung ajak azüoker; tesembuba, Pa tenük agi mongui parnok den ajaklen alir; pezübuba, Pa tamaren yimli nung tanaben adoktsü; pongububa, Kibuba marudang parnok temang asütsü aser Kibuba den kidang alitsü.
Anogo lir alidang parnoki ochi angazükbaji tenük agi mongui Kibuba parnok den teti dena lir ta angazük. Pa temang tenük agi ngua aliba dang nungi tenüki mongui parnok den dena alibaji tali sentiba ta parnoki angazük. Pa tang parnok den tenük agi mongui dena lir- Tanela Temeshi ajanga parnok Pa dak lidaktsür! Yamaji tanüa asen Kibuba Yisu asenok den dena lir. Pa adenbaji akhüm ka ama masü, shidakba lir. Ibai tejembiba ka dang masü, mesüra jangratemtsü o ka dang masü. Ibai teti taküm aliba Kibuba chichiba nung asenok den adenba lir.
Pa adenba tetezü, Pa asoshi kuli asüdang timatemdang ajaklen Pa dena aliba lir. Saka iba ama tenangzükba liaka aikati temulung makai akümer aser temulung masür. Koda taochitsü lir! Kodang Pa adenba metetta melilir, asenok melamelaa temulung makai kümdaktsür, ratamatar, atasaa meliteter aser tai telemtetba agir; saka kodang Pa adenba meteta pelaa lidir, temulung makai akümdang tajung inyaktsü bilemer, rishikangshi mapang taremzük alir, lendong mapang tasü itdaktsür, telemsatep adokdang süngjema alir, terongjen mapang nung pelaa alir. Lisem limaji kolap naro ama akümer, aser ali tapungji atsüki ka akümer. Khristantem, item otem ken shisadangang: “Ajiang, Ni nenok den tatem tashi dena alitsü…!”