TGOUN nungi taila tazüngba kuli magütsü

Dimapur,Aug.08 (TYO) : Taküm küm tetenzüklen osangkaket kar nung  ‘The Global Open University Nagaland’ (TGOUN) nungi tazüngba kuli kaket taila agütsür ta sangdongba osangji tiyazü kechiyong TGOUN nungi iba ama taila tazüngba kaket agüja mali ta yashi yangi Dimapur nung osangbenertem den jembidang TGOUN Chancellor, Wb.T.N.Maneni metetdaktsü.

TGOUN ajanga taila kuli kaket agütsüba osang ya Punjab nung Mansa police ajanga sangdonga liasü.

TGOUN ajanga taila certificate agütsür ta aija sangdongba den ano metemsü ser nung kasa Univeristy nung Hotel Management aser Fashion Designing program agir ta aitsüba ajanga TGOUN kanga nüngku bentettsüogo, ajisüaka item ajakji TGOUN tenüng nung Kolkata aser Patiala (Punjab) nung nisung kari inyakba liasü aser itemji putetogo ta  T.N.Manenisa jangjashitsü.

TGOUN nungi temelaba magi aser memeteti TGOUN tenüng nung taila tazüngba kaket agütsürtemji ana Nagaland police-i 2014 küm Kolkata nung apu aser Patiala nungi nisung asem rongnungi ka apu. Patila nung par asem liasüba nungi ka apu aser ana jenshia senzüa liasüba taküm küm  Punjab police-i pua lir.

TGOUN tenüng nung taila tazüngba kuli kaket agütsübaji “Lotus Education, Society  aser ”  Bhai Gurdas education center” Mansa nati agütsü ta putetogo. Tenati onoki memeteti TGOUN tenüng nung tazüngba kuli kaket ayok, ibaji inyaktsü atema parnok jagi TGOUN meyong seal, logo aser  letter pad dena auyaa amshi ta paisa metetdaktsü.

Kasa mapang nung TGOUN nung Director Dr. Imotemsü Longkümer -i ashiba agi, TGOUN ajanga Lotus Education Society nem counseling center lapoktsü aser University sentongtem nung yariteptsü temelaba agüja lir saka parnoki tazüngba kuli agütsübaji khenyongi aibelen tuluka inyakogo, kechiyong parnok nem iba tashiji agüja mali.

Dr. Imotemsüisa ashiba agi, TGOUN nung agiba program-tem ajak UGC tetuyuba nung maibeleni sayur, anungji Mansa police-i sangdongba osangji shitak masü.

TGOUN nungi taila tazüngba kuli kaket agütsür ta asüba osang ya yimjak nung ajaki meteta akümba sülen Lotus Education Center nungi Sandeep Bahri aser Vivek Gupta na apu aser Bhai Gurdas Education Center, Mansa nungi Vineet Goel puogo, ta TGOUN Director-isa metetdaktsü.

TGOUN ya  State University asütsü ta lenirtemi metetdakja lir aser Ministry of Human Resources aser UGC na pronglai meteta lir ta paisa ashi.