Tir Pranab kinüngtsü Suvra alima nungi pilaogo

August 18, 2015 nü Rashtrapati Bhavan, New Delhi nung Ato kilonser, Narendra Modi-i asür Suvra Mukherjee mang nung naro yuja akhümtsübu agütsüba angur.

New Delhi, August 18 (Agencies): Mongolbar anepdang 10:51 ako nung Tir Pranab Mukherjee kinüngtsü, Suvra Mukherjee alima nungi pilaogo.
Tir kinüngtsü Suvra Mukherjee mapang tatsüka shiranga aruogo aser la tango sashiba dak sentakba timtem ka adoka Hokolbar aonung hospital-i anir oa liasü.
La dak temulungjang tashitak lir aser la Intensive Care Unit (ICU) nung anepalua liasü.
Rashtrapati Bhawan sangdong ka ajanga, “Tanep First Lady, Suvra Mukherjee alima nungi pilaogo ta tejashi nung sangdonger. La tanep 10:51 nung kotaker anisüngzükdagi ogo,” ta metetdaktsü.
Suvra Mukherjee ya September 17, 1940 nü Jessore (tangbo Bangladesh nung lir) nung aso aser July 13, 1957 küm Pranab Mukherjee den kibong akum.
La graduate ka lir aser India national poet, Gurudev Rabindranath Tagore sapur ka liasü. La ya Rabindra Sangeet kentener ka liasü aser küm aika India nungdang masü saka Europe, Asia aser Africa linüktem nunga shilem agia aruogo.
Suvra-i ‘Geetanjali Troupe’ tentet, iba telok ya Rabindranath Tagore indang kentem aser tsüngsang-jilushi tem ajanga pa tesayubatem sangdongtsü nükjidong nung tenteta liasü.
Tir kinüngtsü ya kanga sempet aliba painter ka liasü.
La akümli mapang lai kaket ana zülua lir: ‘Chokher Aloey’ kaket ya la Indira Gandhi den tesentaktep aliba indang aser ‘Chena Achenai Chin’ kaket ya lai China linük semdangba indang lir.
Suvra Tir Pranab na tanur asem- Abhijit Mukherjee, Indrajit Mukherjee aser Sharmistha Mukherjee nunger sosema lir.

 Zeliang-i Tir kinüngtsü Suvra asüko osang lemsatep

Tanep Delhi nung Tir Pranab kinüngtsü Suvra Mukherjee asüba asüko osang lemsadang Nagaland Chief Minister, T.R.Zeliang-i, iba osang tamajung angashia pa mulung züreper aser aoksar, ta ashi.
CMO, Media Cell sangdong ka ajanga, Tir mapang talangka yimtenren nung alidang Suvra Mukherjee ya Tir asoshi temetangdak tongshi ka liasü aser tesüiba küm asem Rashtrapati Bhavan nung Pranab Tir inyakdang la First Lady tetemsü ka liasü, ta ashi.
Suvra Mukherjee ya tashi aketba nisung ka liasü, iba den arts aser literature nunga jenjang tajung alangzüker ka liasü. Kaket kar züluba den külemi la ya Rabindra Sangeet kentener tajung ka aser painter ka liasü, ta kasa sangdong ajanga ashi.
La asüba ya Tir aser linük asoshi takoksa tulu lir, aser iba ama mapang nung iba ya tizüktettsü aser India Tir khuret maneni bentettsü asoshi Tsüngremi tasütait tanela aser tashi agütsütsü imlar, ta sangdong ajangasa shisem.