Tir, Ram Nath-i IAF unit ana nem standards agütsü

November 16, 2017 nü Adampur, Punjab nung linük Tir aser Supreme Commander of the Indian Armed Forces, Ram Nath Kovind-i Indian Air Force 223 Squadron nem Standard agutsüba noksa nung angur. Kasa noksa nungsa Chief of the Air Staff, Air Chief Marshal, B.S. Dhanoa-a angur.

New Delhi, November 16 (Agencies): Brihostibarnü linük Tir, Ram Nath Kovind-i Indian Air Force (IAF) unit ana– 223 Squadron (Tridents) aser 117 Helicopter unit (Himalayan Dragon) nem standard awards agütsü.
Pai tang mezüng Punjab semdanga jembiba mapang nung Tir, Kovind-i akhidang nungi India nunger sepaitemi linük kümzüka aruba indang lemsatep. Paisa, linük senso aika pei kidang ayipjanga mejanger, kechiyong linük arrtsülen tasütait sepaitemi arrtsü nükdar ta meteta lir, ta ashi.
Kovind-isa, Punjab ya sepaitem aser temeshi nisungtem aika aliba state ka lir, aser iba state semdangba atema pelar, ta ashi.
Pai IAF unit anaprong nungi ketdangsertem nem standard awards agütsü, iba sülen IAF sepaitemi Hawks aser Sarang helicopters densema tayimtsü balala amshia aerobatic display sayaa liasü.
Tir-isa iba sentong nung units ana indang information brochure ka sayatsüogo.
Iba sentong nung adener tongtibang nisungtem rongnung- Punjab Angh, VP Singh Badnore, Irrigation and Power Minister Rana Gurjit Singh, MP Chaudhary Santokh Singh, taoba mapang MLA Rajbhans Kaur Rana, Air Chief Marshal BS Dhanoa, Commissioner Jalandhar Raj Kamal Chaudhary, Deputy Commissioner Varinder Kumar Sharma, Inspector General of Police Arpit Shukla, Deputy Inspector General of Police Jaskaran Singh, Senior Superintendent of Police Gurpreet Singh Bhullar aser Superintendent of Police Rajinder Singh Cheema nunger liasü.