TR Zeliang-i Delhi nung Naga Heritage Museum ka yangludaktsünür

Dimapur, September 15 (TYO): Union Minister of State for Cultural Affairs (IC) and MoS for Environment, Forest and Climate Change, Dr. Mahesh Sharma-i Dimapur semdangba mapang Chief Minister, T.R. Zeliang-i pa dang Delhi nung Naga Heritage Museum ka lapoktsü atema tebilemba lemsatep.
Hokolbarnep T.R. Zeliang-i Dimapur nung par kidang Delhi nungi arurtem chiyungi jaok aser idangji pai Union Minister dang tebilemba kar lemsatepa liasü.
Iba mapang Nagaland & Arunachal Pradesh Angh, P. B.Acharya den pa kinungtsü Kavita Acharya nati Union Minister Dr. Mahesh aser pa kinungtsü na den külemi aden.
Nagaland nung aliba kin balala indang putiotsü, kakettem aser osettem sayutsü atema Delhi nung Naga Heritage Museum ka lapoktsüla ta TR Zeliang-i Union minister dang ashiba osangbener den jembidang ashi.
Tang asenoki Delhi nung Emporium ka lir saka ibaji tilaka dang aser tesem tajung nung masü. Delhi nung Naga Heritage Museum den külemi World War Museum ka alitsüla, ta paisa shisem.
Kohima nung Academy Hall yangluba indang olen ka ashidang chief minister-i ashiba agi, SPA kübok mapa noklang nung shilem 70 shi inyakogo.
State nung Academy Hall tajung maliba atema pai Art & Culture kübok senotsü teyari meshi aser iba atema Union Minister-i tezüluba nung agütsütsü ashi, ta TR Zeliang-isa osangbener dang ashi.
Paisa Dr. Mahesh dang Kohima Museum tajungba küma yanglushitsü atema tebilemba lemsatep.
Dr. Mahesh Sharma ji mapa agi inyaka sayuba nisung ka lir aser pai Nagaland nung tourism network tenzük. Dr. Mahesh-i Tourism Minister ama inyakdang Swadesh Darshan kübok Nagaland sen crore 200 dak tema tourism projects inyaktsü temelaba agütsü, ta T.R. Zeliang-isa shisem.
Swadesh Darshan kübok tourism projects mezüngbuba shilem agizükba nung Peren, Kohima aser Wokha aser tanabuba shilem agizükba nung Mokokchung, Mon aser Tuensang nung project tem agizükogo. Ano, tasembuba shilem nung Phek, Zunheboto, Kiphire aser Longleng nung inyaktsü project tem agütsüogo, ta paisa metetdaktsü.
Tang Dr. Mahesh-i Environment and Climate Change mapa bena lir aser iba nunga pai Naga nungertemi yaria tejakleni aotsü imlar, ta TR Zeliang-isa shisem.