Train nung ticket makai senzürtem nung sen aika aazük

Maligaon, November 16 (Agencies): Taküm October ita Ticket Checking Drive nung N.F.Railway pur sen aaba nung terenlok aliba sayuogo.
Yaküm October ita ticket mali-i senzürtem nung sen aaba dang nungi taküm shilem 83.3 agi timba liasü.
Railway Board-i taoba küm zone ajak nung inyakyim asadanger zone ajak atema nükjidong ka lateta toktsü, aser October ita atema Railway Board-i iba railway atema sen aatsüba lateta toktsüba dang nungi shilem 32.2 agi timba aazük.
Maneni taoba küm April nungi October tashi nung ticket makai train nung senzürtem dang nungi sen aazükba den taküm kasa ita den medemdangra shilem 09.42 agi taküm timba aazükba jangjaogo. NE nung August ita tzümetsüng aruba ajanga train senzüsenpongba nung timtem adokaka, taküm sen timba aazükogo.
2017 October ita ticket makai senzüsenpongertem nungi aazükba sen ajak agi lakh 505.20 liasü koba yaküm küm bo kasa ita nung sen lakh 276.02 aazük.
Taküm October ita temelaba makai train nung senzürtem parnok aja agi, 73630 liasü. April 2017 nungi October 2017 tashi nung temelaba makai train nung senzürtem parnok ajak agi 3,98,718 puteta tapet temerenshi agütsüogo.
Iba sentong takok anguba ta railway nung ticket check asüba ketdangsertemi kanga meranga inyakba ajanga lir.
NF Railway pur division ajaki train ajak nung temelaba makai train nung mener senzürtem bushisüngdanga arudar, ta Chief Public Relations officer Pranav Jyoti Sharma-i sangdong ka ajanga metetdaktsü.