Tripura nung BJP busema tesayurtemi longkak ait

Agartala, Aenjeti 12 (Agencies): Supreme Court indang totuyuba nung ajemdaker taoba küm tesayur mapa nungi anentsürtemi Yangtepnü Bharatiya Janata Party (BJP) busema rally ka agi. Mapa anüngzüktsü nükjidong nung inyakba ken o ya khen atidangtsü asoshi BJP ajanga iba ken o ya Ministry of Law dangi tuyu, aser iba ajanga tesayurtemi BJP busema nokdaker.
Iba ken o Center dangi yokba asoshi school tesayurtemi Minister Prakash Javadekar, Assam Finance Minister Himanta Biswa Sarma, MLA Sudip Roy Barman aser BJP lenirtem tenüng asang.
Tawa Sarma-i anir tesayurtem nungi nisung tenet-i Javadekar ajurua, parnok mapa kümzüktsü asoshi Right to Education Act ya benoka tesayurtem tasen shimba nung mapang ka asoshi anena atatsü temepishiba agütsü.
Parnoki mepeshiba nung Union Minister-i telangzüba tajung agütsü aser iba ken o ya Law Minister nem asadangtsü asoshi agütsüogo, ta tesayurtemi ashi.
Tesayurtemi ashiba agi, parnoki state Education Minister Tapan Chakraborty ajurua Center nem iba ken o reprangtsü asoshi ajungshi, saka pai iba temepeshiba magizük aser iba ajanga parnoki BJP dangi ao.
State sorkari parnok den külemi alitsü nangzük saka temelenshi tajung kicha matalok, ta parnoki shisem.
Supreme Court ajanga tesayur 10,323 ya taoba küm Luchii (December) 31 nung anentsü, saka state sorkari petition agütsüba nung ajemdaker parnok indang mapa ya ‘fresh ad-hoc’ yimya nung ita trok asoshi atsülangtsü.
Tsüklai (February) 2018 Assembly election agitsü lia item tesayurtem mapa nungi anentsüba ajanga Left teloki yimsü süa aliba Tripura state nung yimden yimsüsüba tsütsü temelenshi arutsü, kechiaser iba state nung aliba Congress MLA ter nungi parnok trok BJP dangi arua iba telok ya opposition telok tuluba küma lir.