Tsüktem aser Sentem

~   A. MAONG AIER RTD. G/T ALONGMEN WARD

Küm tasen nung ya khen shisadangdi
Tsüktem aser sentem atema ya khen aroka shisadangdi. Shin o ka nung ashi ama tanaben shiloa bilemtetbaji shisabulu tetenzük, saka tanaben meyipa bilembaji tarutsü atema lesson angazüker.
Mezüngbuba nung ni ya shiner, akhi mapang tsük tin ana apu nung alu rur tin ana tetemlok adaktsü. Iba mapa ya yim shia ozüng kasa liasü. Aji shisadangra sen asü nung noklang shia 50 tetemlok adoker. Akhi nungi tang tashi takar aliba agi tang sensakera liteter, aser sensaker aliba agi tang takara liteter. Saka taoba mapang tsük apubaji aroka shisadangra kodaser takartem taochi mali aser ano yim shia nung yimdeni iba ozüngji mela ta bilemer. Alu ruzüker takar nem tsüktem agüja, ter shilem adakja aser ano saro agütsürbo ita anasemka chiyongtsü tang anüngba kü taküm nunga ngua aruogo. Tanü asüng lanur aser lanutsürtemi iba mapang koda lia aru, itemji memetet, parnok temulung atangtsü asoshi tsüraburtemi ashitsüla.
Akhi mapang store jang aser dokan janga mangu. Saka ni bilem, ya 1960 meta ka nungi ang angu. Iba yongji tsüktem ya iba küm nungi anenadok. Tetezü alima melenshia aoba ajanga iba mapaji anena adok ta angateter. Akhi mapang tsük tin pezü nung tetemlok tin ka tang agi asübo sensakertem kangabo mekangshila ta sasaa bilemer. Alima rara ajanga akhi ama pei-i züsentetba tang chiyonga jema alitsü mapanga arutsü shibai metet. Anü lur tsük tepu, Waro or tembang takoshi ta shin o nung shia liaka tarutsü atema yamaji atalok nunga shisadanga inyaktsü nükla ka lemsateper ta angatetdaktsüner.
Tanabuba onük nung ni ano ya shiner, sen tetemlok keta aputsübaji temenen ta Temeshi Lai nung shia aliyonga nübur khar dak alaka shingaia mangar. Iba ya tarutsü lanu putu tashi yamai tang aotsü asü nung ni ya atema shiner. Government-i sentem agiba aser tetemlok agütsütsüba yabo 10% to 12% tashi küm nung khen dang agir mesüra agütsür. Yabo taochi tulu sayuba ta angateter. Govt-i public dang 5% tema agi sen taputsü ta ozüng agüja aliyonga, khari sentem madena aputsüaka karibo 6% to 20% tashi agi aputsür. Itemjibo tetzüa lira mapang shia tashitak tamajung adoka, mesüra yiruyibong tulu adoka alima talangi sentemji bener shikmeni aoba angashir aser aika takema tempanger aser kanga aka yonga kibong nungi pelatepa aliba mangur. Anungji sentemji 5% nungi shir teküpok agira sensakertem kanga tang anisüngzük angutsü.
Tanü asüng jila aser yimtsüng shia nung telok tentet zünger mezüngma aika lir. Item ajak jagi rongsen lenmang bushidang sentem keta sen aputsür. Item telok shiaji shisadangra nübur noklang nung 20 takar, 30 tanü poksüng alirtem aser tanüngba 50 ji sensakertem ta ongko jagi sayur. Takarji teti takarsa alitsü, sensakerji teti sensakersa alitsü. Takartemi item telok sen nungjagi 5% agi apur sensakertem dang 8% to 10% agi aputsür. Ano kanga takaribo 3% agi lakh junga apur sensakertem dang tetemlok aika keta aputsür. Parnok akaba yong taputsür alir, saka sensakertemi iba ama inyaktsü lenmang mangur. Kechiyong parnok makaba agi kimong lumong yoka tim atemba tia indang taoba küm ocet zülur kati tabensa shia paper nung adoktsüba züngshia nia pa den yarisema iba onük ya lemsatepnüa bilem. Saka tang onük lemsatepnüdang iba onük ya ang mapang ngua lemsateper.
Asenoki tanü putu nung taochi sayura asen putu nunga sensakertem terabo anisüngzüktsü aser tarutsü atemaka asen chir aser semchirtem tim medemi lidaktsünüa bilemdang telok ajaki sentem ya 3% tashi agi tang amshi nung kanga dang jungla ta kü tangatetba ka kü o tatsü agi nübur ajak den olemsabang ajanga lemsateper.