Tsüngrem aser Tamangertem

– K. Imliyanger Jamir, Erali bill, Dimapur.

Nükpokeri tobur tajung Tsüngremi yanglubatem mangu ama, tanela tenük tapok tamangeri Yisu alima tesangwa memetet. Nükpoker jagi metetsümonga aibelen masür. Kechiaser parnoki tajunga mangur aser tamajunga mangur. Saka tanela nung tenük tapok tamangeribo tajung aser tamajung ajak angu nung parnoki metetsümonga aibelener. Tenük tapok tamanger jagi ashir, iba lima tobur ajungji parnoki kodanga mangu, aser ashitsü makoker. Saka kotak tobur ajungjibo parnoki angutsü; aser parnok kotak nung Yisu den teti alitsü. Kechaiser parnok teimlaji kotak nungbo Yisui parnok tenük lapoktsütsü. Saka tanela nung tenük tapok tamangeribo tanela tenük melapokra kotak tobur tajungji mangutsü.
Nükpokeri ashri, teka agi meyangluba lima nung alitsü parnoki yongyar. Iba menen lima nung parnoki kecha mangu; aser majitet nung teyanglur dang pelar; kechiyong iba lima tepelaji khen asoshi dang, saka parnok kotak nungbo teti pelaa alitsü. Kechiaser parnok tanaben asoba taküm aser Tsüngrem chirtem ta kuli tejangja parnoksasa tanela ajanga metet. Iba tamang lima nunga parnok mulung nung sangwa tulu lir. Kechiyong Tsüngrem tanela parnok mulungjang nung anisüngzükdaktsür.
Yisu zü agi parnok shitok nung parnoki nüngsang ken atener. Temalen teka agi meyangluba ki ka; parnok atema pai renemja lir, idakji parnok ken tena teti tepela nung Yisu den alitsü yongyar. Tsüngremi yanglubatem parnoki kecha mangu; saka Tsüngremi yangluba lima nung parnoki lidaktsüba yong pa mulung chia alitsü nangzük. Parnok rongsen maka saka pelaa alir. Kodang kotak tobur ajungji parnoki ngudir; idangji parnok tepela teperi akümtsü. Nisung merijangsa merijang kibubai obendangtsü, idangji tatembangji arutsü, iba anogoji parnoki yongyar.
Tamangeri tanela temeshi magizüki lira agizüktsü nüngdakter. Tanela temeshi magizükba tamanger kaji nükpoker ka mesüka lir. Nükpokeri tesangwa indang kuli mesütet ama; Tanela temeshi makaba tamanger kati Yisu alima tesangwa indang kuli mesütettsü. Davidi pa dak nungi tanela temeshi bener oadoktsü tsübu. Kechiaser pai tanela temeshi agizüka liasü. Tejen lai mapang nung tanela temeshi nisung ajak dak maliasü, pa tenyaba mapatem inyakdaktsütsü asoshi mapang balala nung nisung kar dangi tanela temeshi aru; aser parnok nem tashi aser sempet agütsü. Tanela temeshi paji; pa sasa Tsüngrem. Manguba Tsüngrem nisung den dena alibaji tanela temeshi; paji teyarir, tetuyur, aser tesüneptsür. Kechiyong pa asen rongnung ka. Yisui pa nütsüngtem dang ashi, pa orr külen parnok den teti alitsü asoshi tanela temeshi yokang ta tebu dang asüngdangtsü.
Tanela temeshi tadenbaji yamai liasü, alima yangludang pa dena liasü, taküm tangula apouktsüdanga pa dena liasü, laishiba züludang Tsüngremi mulungba ama pai tetuyuba agüja züludaktsü. Yisu aser pa nütsüngtem den pa dena liasü. Pai ainkar ajanga Tsüngremi mulungbatem, Tsüngrem nisung ajanga kuli südaktsü. Tanela temeshi pa asen lenir tulutiba.
Yisu asen kümtetdakba tanela temeshi-i mashisa kümdaktsü, aser tanela temeshi tashi agi pa meshitettsü. Kechiyong pa nisung liasü. Yisui tebu dang; pa den alidang kechi sentsüwangshi liasü, iba sentsü wangshi jagi pa den sentsüwangshidakjang ta mepishi. Yisui pa nütsüngtem dang nangzük, tanüla temeshi pa tenüng nung yoktsü. Yisui ashi, ochi tanelaji tebu nungi adoker. Paji parnok dangi yoktsü, aser pa kodang arudir pai Yisu indang kuli asütsü. Nütsüngtemi tanela temeshi meteta liasü, kechiyong pa parnok den liasü.