Tsüngrem den jajaba nisung

Alima majungba ya tanü tasen masü aser alima nung nisungtemi temenen mapa inyakba ya tanüang inyaker masü. Lipok tapu 6 tekong 12 nung yamai shia lir, ” Tsüngremi alimaji reprang aser ibaji teraksa aser memeshi liasü; alima nung meimchir ajakji temenen yimya nung aliba Pai angu.” Iba mapang tashi ya nisung arishi küm noklang aika liasü, saka alima nung nisungtemi temenen mapa inyakba repranga melinüba agi Tsüngremi meimchir arishi sükdoktsü aser Tsüngremi ashi, “tang nungi nisung arishi küm 120 dang alitsü.” (Lipok 6: 3).  Tsüngremia Pasasa junger ta shitettsüsa yangluba lima nung nisung arishi küm meyirijang junga lidaktsütsü atema yanglu ser nung, Pai mereprangnütsüsa nisungtemi tesempatsüka litetba agi arishi tatsüba kümdaktsübaji kanga tesasatsüka lir. Aji oda, Noah putu nung alirtemi Tsüngremi maginüba inyak nungji Tsüngrem kanga mepelai aküm (Lipok 6:6). Iba putu nung teburtemi kecha mashibangi pei nük dang tobur junga anguba tetsürtem pei kinüngtsü asoshi pei aginütsü agi aser alimaji azü tokshiba agi sünga liasü. Iba mapang nisung shingaia Tsüngrem lir ta mezüngshi aser Tsüngrem tsüngdang kechi majung, aji Pai yangluba nisungtemi Pai yangluba lima nung inyak. Ibayongji, Tsüngrem kanga jashi aser Pai alima nung alir meimchir ajak meshimeshia samatsütsü mulungtet. Ajisüaka, iba ama tejashi tulu ajuruba tensa tia ka nung Tsüngrem mulung anisüngzüktsüsa aser Tsüngrem taochi ngutettsüsa nisung ka liasü. Iba ama alima tamajung, ajaki tamajung inyaker asünungji, tajung inyakertemang menütsüba aser ochishia alirtemang takoksa ama bilemba putu tamajung ka nung, Tsüngrem den jajaba nisung aser kibongji Noah liasü. Laishibai ashir, ‘Tsüngrem nükdang Noah-i taochi angu. Par putu nung Noah ya ochishir tetemjen nisung ka liasü. Pai Tsüngrem den jaja.’ Tetezü,  Noah-er yimer ajaki Tsüngremi memulungba inyak. Pa den külem inyakertem ajaki ochimashi benshia alitsü. Par kiyonger  ki ajak nung tashiyim agi bendenba aser rakzükratemba osettem agi sünga liasü südi. Par medemer aser parnok chinurtemi nisung tepsetba aser tashiyim agi mapa tamajung inyakbatem Pai angashia alitsü. Ajisüaka, Noah-ibo Tsüngremi pa dang aochitsüsa litet. Pai teti Tsüngrem den jaja aser pa dang masü par kibong ajak tzümetsüng lendong nungi taküm kümzüktsüsa pai ochishia ali. Alima temenen agi sünger, Tsüngremi nisung yangluba atema Pasasa Pa jashia aliba mapang ka, kibong ajak Tsüngrem nungi taochi angutsüsa litetba Noah aser par jabasotemji tenükshitsüka lir. Alima tamajung, pei inyaknütsü inyakba aser tetsür a pei aginütsü shima agiba putu ka nung tebu den külemi tashi angaa Tsüngrem nungi taochi angutsüsa aliba Noah-er jabaso kibongtem nungjagi asenoka tangazüktsü tajung aika lir. Parnoki tashi angaa tebu den külemi küm noklang junga rong yangluba mapa nung shilem agi. Parnok taküm aser kibongji par medemer aser yimtsür-yimertemi benshiba temenen mapa nem manishidaktsü. Aji oda, tanü putu den Noah putu medemdangra kecha tepila malitsü amai bilemer saka ano tanü asenok kibong den Noah aser par jabaso kibongtem den medemdangra tetsüngda talangka lia asenoki asenoksasa reprangteter. Aji oda, tanüa asenok meketa tamajung agi sünga lir. Item tamajungtem meinyakba agi aiben asenok mapa nung takok mangur aser takar makümer. Tangari inyakba tamajung mapatemji asenoki inyaktsüa koka lir aser itemji inyak nungbo tangar ama jangratema litettsü ta asenokia meteta lir. Aji oda, tamajung meinyakba agi gari maka, ki tajung meyangluteter, chiyongtsü techinütsü alia mechiteter, tanurtem school tajungi meyokteter ta timatemdang, ashiko asenok aika tezüdanga alitsü aser tangar ama tamajung inyaktsü aiben temulungjang nung ajungshia alitsüa akok. Ajisüaka, aremzükang aser Tsüngrem den dang jajaang. Kenü Noah aser par kibongi anguba taochiji asenokia angutsü. Tenüngsang Ken nung ashir, “Kibuba dak amangang aser tajung inyakang.” Idakji Tsüngremer tenangzükba aser teimla ajak dena lir.