Tsüngremi pa mapa nung tenzüktsü ajaba

~ L.Kika Pongener, Aoyimkum,Dimapur.

Asenoki laishiba nung züngdangra Tsüngremi putu tensa mapang balala nung Pa tenzüktsü atema nisung balala ajaba angutsü,nisung kar lenir asütsü sempet keta lir sernung aser ken o tetangshi shia meteta tonga lir sernung majar,karbo memelungi nungnanga tatemtsü o jembiaka odang kangshia nungloktsür. Anitet-3:7-10. Nungji züngra Tsüngremi Israel nunger Ijip lima alar tia nungi anitettsü asoshi Mosa yimsusur ka aser Putir ka asütsü shimtet,saka iba mapang nung ya pa Ijip nunger ka tepseter jena orr bendang lima nung bendangtsür agir Horeb tenem nung teko Jetro’er san nüka liasü. Aser Mosai kangasa memulungaka Tsüngremi odang kangshia nungloktsü,tedi Aron pa dang nungi tashitemetetba o tsüngro songa jembiteter nisung sernung pa masü,saka Mosa -ang kangshia shimtet. Aji oda kobala ama jenjang ka nung lidir liaka adianu karbo arogo nung aser wadang balala nung tenzüktsü asoshi nai na metemsü ta ajemrepa bilemaka aser nai memulungaka odang ne nemsa nungloktsütsüa akok. Anungji Tsüngrem sentong angateta Tsüngremi ne taküm metemsüba nungi tetemsü kümdaktsür pa asoshi naji hadir ka sudaktsünür südi ta angateter mulongsoa tenzüktsüla. Ajisüaka ano karbo Tsüngremi na majar sernung nai nesasa penpua bushia nübo yima shimdaktsür tenzüktsü akok,saka iba jagibo na-a temoatsü masütsü lokti-a tajangzük masütsü.Tsüngremi Aron o tsüngro songa jembitetba tashir nisung ka suaka pa meshimtet. Iba sülen atalokba reprangdangra, Mosa Sinai tenemi tur lia Israel chirtemi sungyanglu yanglua külemtsü pa tang khanga meshi aser Aroni lokti mesoiteti nashi chanu ka yanglur külemdaktsü. Aron ya ochi nungbo tasü itta akhang – akhanga nokdakba lenir ka masütsü ta Tsüngremi mezüngyongi ajioka liasü, aji agi meshimtet sudi ta bilemer.
2 Samuel-18:19-23. nungji züngra Dawid’er sepoy o Absalom’er sepoy na tongpang tesashi rara aser iba anogo nung Absalom Dawid chuba’er chir Dawid-i kanga temulong toka meimsang tepseter, iba osangji chuba dangi orr sangoktsütsü asoshi tanishir Joab-i Küsh nunger par sepoy asangur ka yoktsü shimtet.Ajisuaka ano sepoy rongnung tangar ka Ahimaz-i pai orr chuba tang osangji sangoktsüdi ta pasasa meshizük,saka Joab-i memulong. Aser Joabi Küsh nungbaji chuba dangi osang bener yok,ajisuaka Ahimaz-a pa sasa odang apusoa ao aser pai pa medemer Küsh nungbaji ajateter Dawid chuba tonga ao,aser kodang chubai rara osangji koma ? tongpang takok nguogo ma ? aser kü chir Absalom taküm lir ma ? ta asüngdang, Ahimaz-i langzü tanishir Joab-i kodang ni yok ni rongrongshishi tuluka angu, saka kechi’ar ni tejangja memetet. Iba osang jagi chuba tzüra matem.Iba sülen Küsh nungba aru aser chubai pa danga kasaji asüngdang aser Küsh nungbai langzü Kü kibur tongpang takok nguogo aser Absalom süogo. Ahimaz -i kechi atalok ajak jungjunga meteter iba osangji chuba dang ashitsü ao,saka chuba’er jabaso Absalom tepsetba osang indang indanga chuba dang ashitsü temulong moulotet,tejak maremtet. Tanü putu nunga arogo aser yimden nung lenir aika nüburi shimtetba masü saka peisasa tashi amshia rongsen agi alizüker tashiyim agi nubu yima tangar ajateta lenir akümba jenti lir. Ajisüaka konang nüngsang tenüng tajung dang aginur,nüngsen nungmenbo maginer,ken o tasak tsüngsak-mopong tesashi ammang-tsümang arudangbo metizükteter,takar tulur aküm sentsü aketer nisung dangbo aibelenogo ta metetsümonga-ka tim ochi o bendang magütsüteter, tejak maremba tenzüker Ahimaz amaji aika lir. Mathi-8:18-22 ji züngra Tezülur nisung kati Yisu dang Kibuba na kolenisa odir nia ne sülen anidakdi ta asüngdang,ashiko paa nütsüng ka sünüa Yisu dang indangindanga pa sasa asüngdang südi,saka Yisui pa dang langzü Shirongtem lungki kar aser anüng ozütem tesep kar,saka nisung chir tekolak atalokdak maka, ta tang langzür toktsü,ashiko Yisui pa nütsüng ka asütsü medemsüi reprangtet südi. Iba sülen tangar ka dang Yisui kü sülen anidakang ta ashi,saka nisungba jagi langzü, Kibuba ni tamasa kübu aremtsü melaangma. Saka Yisui ashi tasürtemi pei tasürtem aremtsü tokjang,saka nabo arung kü sülen anidakang. Tezülur nisung jagibo Yisu sülen kangasa anidaknüa asüngdang, saka Yisui memulong,aser tangar nütsüng jagibo tanga tatemtsü o kar ashi,ajisüaka Yisui odang kangshia ajaba asenoki küli tejangja angur. Aji oda Tsüngrem’er mapa nung tenzüktsü ajaba yabo kenyongi balaka kar memulongaka metenzüknüaka odang kangshia ajar aser karibo kangasa tenzükner sernung majar.
Temeim amangba purtem, asenoki tanela tekümtet asoshi ajaba aser tenzüktsü asoshi ajaba ana ya meyoktepa mangatettsüla. Tekümtet asoshi ajaba nung yabo tashir mashir tetemsü metemsü kecha tebendang makai shirnoki Yisuji kü kümtetdakba aser kibur ta tebang agi nangzüker aser temulong agi amanger parnok ajak ajar. Ajisüaka tenzüktsü ajaba yabo nai tenzüknüaka Tsüngrem tsüngdang temsüa melira majatsüa akok,aser karbo metenzüknüaka kangshia odang ajar. Anungji shiba ajar pa/lai pei tajaba jungjunga angateter tenzüktsüla. Aser arogo nung süaka,mungdang nung süaka, yimten aser lokti balala nung süaka lenir shimdang kanga junga shisadanger tang shimtsüla.Nisung karbo konang nungsang tang aginür saka nungsenbo maginür-a lir,karbo ajunga nung kibur süner saka kiburbo mekümtetba-a lir,ano karbo shilem ajunga pai/lai dang aginür saka lokti temulong süa kecha nunga magiteter,oda pa/la-ji lokti jagia komaka agizüker,junger ta temulong süa ali asü mesüra temulong masür’ar pei sasa meshisadanger. Tsürabur otsü nung sangkeni pei tenüng memetet ama ta jembir,peisasa pei-ji kechi’ar memetet pei sempet mangateti tenzükba lenir aika lir,aser item jagi tanü arogo ,yimten,aser lokti ajunga rajang kümdaktsür. Anungji kechi wadang nung südir süaka lenir shimdang kobala mapa asoshi shiba tetemsü nisung asütsü ta kanga aroka shisadanger tang shimtsüla. (Right person for the right job). Kin kidong-a mapitsüla,takar-tulur-a mapitsüla,yim-tzükong-a mapitsüla,ajisuaka Tsüngrem tang asüngdanga tapet nisung shimtsüla. Pauli Timoti dangi züluba shiti nung, tenzüker ka koda shimtsüla tejangja shia aliba amato pa/la-ji tezülen nungi küli tajung anguba tarak maket taküm asütsüla aser nütsüng tasen masütsüla. Tanü putu nung arogo ,yimten aser lokti aika nung takar tulur tashir apia jungjunga medendangi nisung mashi shimmer lokti shirangdaktsüba aiben dang ajurur. Anungji, kanga dang shisadanga tendanger kangasa sarasadema Tsüngremi mulungba kechi aji asüngdanga shimtsü kangasa tongtipang-a ta iba Tsüngrem o ajanga ayongzüker.