Ukraine-i West yimya nung police force tentetshir

Kiev, July 06 (Agencies): Ukraine-i West yimya nung par police force tentetshiba osang jangjaogo.

Tesüiba mapang nungi  benshiba Soviet yimya aser tentet balala nung ochimashi inyakbaren agientsü nükjidong nung Ukraine-i police ketdangser 2000 tashi tan asensa anioksema par police tentet West yimya nung tentetshitsü tenzükogo.

US aser Canada police ketdangsertemi sayutetba police ketdangser tasentem indang uniform-a tasen küma yanglushitsüba den külemi, taoba mapang nung Soviet yimya nung amshiba ‘Militsiya’ tenüng melenshir külen, tan tentetshiba police telok nem ‘Politsiya’ ta tenüng jatsüogo.

“Temzüng ozüng ayutsü den külemi, nüburtemi temelenshi agitsüji takokba maparen ta amangtsüsa nenoki nenok nem nungloktsüba maparen inyaktsü ajungshir,” ta jila tulu balala nung duty inyakdaktsütsü asoshi renemba police telok tasenba nung ketdangsertem den ajurutepdang Ukraine Tir, Petro Poroshenko-i metetdaktsü.

Tan police force tasen tentetba ajanga Ukraine-i  Russia pusemba Tir, Viktor Yanukovych yimsüsütsü menden nungi yaküm 2014 küm February ita tashiyim agi atsüngdokba sülen tan mezüngsüa Russia nungi shizükba inyakyim khen yongi balaka küma melenshir lir.