Vanguard FC-i 3buba Capt. Kenguruse Tournament kokogo

Kohima, September 21 (TYO): IGAR (North) kübok 5 Sector Assam Rifles ajanga ayongzükba 3buba Captain Kenguruse Memorial Football Tournament final Brehostibarnü asayaba nung Vanguard Football Club, Tseminyu-i akok.
Iba asayamung asembuba final kanga jangratema asayaba nung taoba küm ana tashi takok marok bena alir Naga Football Club madak Vanguard FC-i 2-1 agi akok.
Asaya tenzüker minute 26buba nung Vanguard FC nungi Tingyek Konyak-i mezüngbuba goal agütsüteta mezüng asaya tembang. Tanabuba asaya tenzüker kasa telok nungi Yhunshalo Kemp-i minute 62buba nung tanabuba goal agütsü.
Defending champion Naga FC nungi asayar Kwetelhi Thopi-i minute 86buba nung par telok asoshi goal ka agütsütet, saka par telok renemshia asayatsü mapang meliasü.
Iba football asayamung akokba asoshi Vanguard FC nem takok marok den sen lakh 1.7 aser kuli kaket agütsü aser runners-up Naga FC nem sen 80,000 den marok aser kuli kaket agütsü. Iba asayamung semi-final nung tsüker telok ana, Green FC aser Naga Terriers na nem sen 25,000 agütsü.
Iba asayamung nung jurila sempet angurtem yamai alitsü:
* Player of the tournament: Kwetelhi Thopi (Naga FC)
* Best goalkeeper Kevikielie Pienyu (Vanguard FC)
* Highest Scorer: Yhunshalo Kemp (Vanguard FC, goal 10 agütsütet)
* Best Referee: Medozevi Punyü
Iba asayamung tatembang sentong nung GOC 3 Corps Lieutenant General Anil Chauhan tongti tesemdanger liasü, aser takok angurtem nem pai sempet agütsü.