Vijender ‘professional’ akümtsü bilembaji agizüktsüla: Mary Kom

Kolkata, July 5 (Agencies): Olympic nung bronze medal angusang Vijender Singh, professional akümer asütsü akok, ajisüaka India tsür MC Mary Kom-i Deobar nü ashiba agi, labo pro makümtsü aser Rio Olympics 2016 sülen anisüngzükba mapa lai lapokba tsüngtepba academy nung temulung agütsütsü.

“Nibo pro makümtsü. Ni tamalen ashiba ama Rio 2016 sülenbo ni tsüngtepba nungi anisüngzük agitsü,” ta Deobar nü Olympic nung bronze medal angulai osangbenertem dang ashi.

Arishi küm 32 tain, Mary-i 2016 küm la tsüngtepba nungi manen tsüngda India tenüng atutsü atema ano medal kabosa angutsü tebilemba lir.

“Ni India nem medal aika ngudaktsüner aser ibaji koktettsü atema ni lanurtem junga azüoka training agütsütsü. Parnok den ni ajang shia aruba lemsatepner,” ta Manipur tsürlai ashi.

Vijender-i mera tasen agiba ajanga olulu aser mangatettep aika adok kechiba süra pai agiba meraji pei atema asaba aser linük anema ta züngshir.

Aji oda süaka Mary-i ashiba agi, Vijender-i tarütsü atema telemtetba tasen agibatsüba atema temeten lir.

“Pa pro akümtsüji pa mulung… pai linük asoshi medal aika bener arutsüogo. Pai konang bentsür aruba asoshi ni pa tushir,” ta Mary-i ashi.

Lai sorkar dang school tem nung tetsür tem atema taküm kümzüka alitsü nung yaritsü atema karate training agüjang, ta asüngdanga liasü, kechiba süra tang alima tensa kanga majung akümer, ta Mary-isa shisem.