Virginia nung tekülem ki malir atema Chick-fil-A restaurant amshidaktsür

Texas, September 13 (Agencies): Chick-fil-A restaurant ya Deobarnü bo shibanger iba restaurant nung inyakertem iba temeshi amungnü anisüngzüka Tsüngrem külemtsü mapang agütsür, saka Virginia Chick-fil-A bo mapa tajung balaka inyaker.
Sandstone nung aliba Virginia Chick-fil-A nung ketdangsertemi iba tesem ya Deobarnü tekülem ki ama amshidaktsütsü molungogo.
White Oak Community arogo ya Econo Lodge hotel anasa aliba ballroom nung tekülem sendong agia liasü. Saka iba tesem ya mamshitettsüsa aküm.
Onok tang tekülem agiba tesemi arudang iba ki kishi nung iba ki mamshitsü asoshi zülur yuja liasü. Iba tesem ya Econo Lodge atema dang lir. Anungji onok asoshi tekülem ki mali,” ta iba arogo ajanga Facebook nung zülutsü.
“Tsüngremi mapa tajung inyaktsü asoshi Pai aiben onok tesem kar nungi ainshidaktsütsü meranger. Tanep onok tera tezü adang, saka Tsüngremi onok atema rizünga yuja aliba meteta pelar,” ta Facebook nung züluja lir.
Iba ama timtem tia ka nung aliba mapang Chick-fil-A ya aru.
Iba arogo nung inyaker ka Chick-fil-A nung mapa inyaker, aser lai iba restaurant ketdangser den jembia iba tesem ya tekülem ki ama amshitsü asüngdang aser ketdangseri molung, ta osang ajanga ashi.
Iba tesem nung Deobar sentep agitsü molungba asoshi kanga pelar, ta White Oak pastor Dave Wilde-i Chik-fil-A dang ashi.
Tekülem ki tasen meyangludang mesüra tanga tesem ka mongutet tashi iba Chick-fil-A restaurant nung tekülem agitsü.
Tsüngremi onok asoshi anu kechi inyaktsüar aji angutsü matateter, ta iba arogo-i Facebook nung post sütsü.