Vyapam ken o CBI nem bushidaktsütsü asoshi SC dang mepishitsü: Chouhan

New Delhi, July 08 (Agencies): Madhya Pradesh nung Vyapam ochimashi ken o dak sentakba nung nisung jenti asüba nung ajemdaker opposition-temi iba ken o ya CBI nem bushidaktsütsüla aser Madhya Pradesh Chief Minister Shivraj Singh Chouhan menden nungi aludaktsütsüla, ta rongshiba sülen tanü Chouhan-i, pa CM menden nungi malutsü ta ashiba den külemi opposition-i par sorkar asoshi tetsükdaktsü bener arutsür, ta aitsüogo.
“Kü yimsüsüba kübok Madhya Pradesh nung terenlok aliba ya Congress aser opposition-i magizükteter. Tetenzük nungi parnoki ni menden nungi aludaktsütsü asoshi akhanger. Parnoki Madhya Pradesh nem tenüng menük bener arutsür,” ta pai New Delhi nung osangbenertem dang ashi.
Vyapam ken o dak sentakba nung BJP bangdak lenirtem ajurutsü asoshi tang Chouhan Delhi-i oa lir aser pai, iba ken o ya CBI nem bushidaktsütsü asoshi par sorkari Supreme Court dang mepishitsü, ta metetdaktsüogo.
“Onoki (Madhya Pradesh) High Court dang parnoki bushisüngdanga alibaji CBI nem bushisüngdaktsütsüla ta shiogo. Iba onük ya asüng Supreme Court nung benoka jembitsü,” ta Chouhan-i ashi.
Iba ken o ya CBI-i bushitsü asoshi kechiba pai mezüng yongi mebenok ta asüngdangba langzüdang Madhya Pradesh CM-i, “Vyapam ochimashi ken o bushisüngdangba maparenji junga odar aser CBI nem agütsütsü menüngdak ta ni bilema liasü. Ajisüaka tesüiba anogo ishika tatalokba nung ajemdaker iba ken o ya CBI nem bushidaktsütsü asoshi ni lemtet,” ta ashi.
Chouhan-isa, pai Supreme Court aser High Court dak tamang kanga akar aser democracy linük ka nung yimsüsürtemji nüburtem kilir lir, ta ashi.
“Iba yongji High Court-i ketangsüa STF (Special Task Force) kübok CBI nem junga bushidaktsütsü asoshi ni High Court dang mepishiogo,” ta pai ashi.
Chief minister-isa, iba ochimashi ken o dak sentakba nung nisung aika asüba ya kangasa tia maka ka lir aser CBI-i bushisüngdangba sülen ochiji jungkai adoktsü, ta ashi.