Western Angami-I A/C nung common platform agi

Kohima, Tsüklai 12 (TYO): 8-Western Angami Assembly constituency nungi candidate ajak indang common platform ka tanü WAPO ground, Sechü Zubza nung ayonga agi.
Iba sentong ya Western Angami Public Organisation (WAPO)-i ayonga agi aser constituency kübok yimtsüng ajak den Kohima jila nungi Daklane, New Market, Naga Hospital, Midland aser Officers’ Hill kiyongtem nungi nisungtem aden.
Iba assembly constituency nungi candidate asem- Kevisekho Kruse (NDPP), Keneizhakho Nakhro (NPF) aser Asu Keyho (NPP) nungertem lir aser tanü parnoki külem sabang nungi parnoki constituency nung alirtem atema inyaktsütsü ta asüba sentongtem metetdaktsü.
Sentong nung retired Chief Engineer, PHED, Kevisekho Kruse-i o jembidang constituency aser Naga nunger lennitsü atema election nung tokteper ta ashi.
“Asenok lennir tajungtem agi anünga lir. Anungji, asen loktiliba tejakleni aotsü atema lennisüba tajung nüngdaker. Mangdang maliba lennirtemi asen khurettem mekoktettsü aser asenok tejakleni anir moutettsü” ta Kruse-i ashi.
“Tanü tensa reprangdangra, yimsüsür aikati tashi rakteper aser iba jagi sorkar takang ka malitsüsa aküm. Chief ministerial candidate Neiphiu Rio lenisüba kübok NDPP-BJP-i taruba sorkar akümtsü” ta paisa shisem.
Class-I Contractor aser NPF candidate Keneizhakho Nakhro-ia o jembidang, “Ni public-i aginüba ama tashishitsü melii inyaktsü. Ni election nung toktepbaji temelenshi bener arutsü tangatetba nung lir” ta ashi.
8-Western Angami assembly constituency nung regional party-i teti takok tajung angur aser tang-a iba constituency nung alirtemi an tebong maitsü nem vote agütsütsü imlar, ta paisa ashi. Candidate asem rongnung Nakhro ya tanubosang lir.
Taoba MLA aser NPP candidate Asu Keyho-ia ashiba agi, taruba sorkar akümba nung par party-i tongti shilem agitsü.
“Taruba sorkarji teloktep sorkar ka asütsü ta ni bilemer, kechiyong party kati danga menden teimba nung takok mengutettsü. Anungji, NPP candidate temi sorkar akümba nung tongtipang shilem agitsü” ta paisa shise.
Iba sentong nung mendenji WAPO president Lhouphrevilie Rino liasü, St. Maria Gorette, Sechü Zubza catechist Medolepra Lucas-i temoatsü meshia sarasadem, Asenuo Medoze aser medemertemi ken ka aten aser WAPO vice president Dzüviu Zhünyü-i anküp tepela o jembi.