Xavi iba season tatemden külemi asaya nungi anentsü

November 11, 2017 (Agencies): Taoba Barcelona aser Spain midfielder, Xavi Hernandez iba season tatem den külemi asaya doktsütsü asoshi renema lir, aser pa coach ka ama inyaktsü asoshi tejangraba aliba lemsatepogo.
Arishi küm 37 asayar ya Barcelona nungi asayaa aliba mapang nung La Liga titles ti aser Champions Leagues trophies pezü ta koktetogo, aser pa tang Qatari club Al-Sadd captain lir.
Xavi ya central position nungi asaya ajak azüoka asayaba atema kanga nüngtugu lir aser pai ashiba agi, asaya ka tembangba sülen temang shia arutsü asoshi mapang talangka agir.
“Ni asaya aruba peyong meyirui dang aruba ya kanga tia tajung lir, saka kü career tatembang kati aruogo, ni tanemi atsüngzüka odar,” ta pai osangbenertem dang ashi.
“Ni asaya nung shilem agidang tang kanga tebelemba asür aser temang shia arutsü asoshi mapang talangka agir. Iba season ya asayar ka ama kü asoshi tetembangbuba season asütsü.
“Ni sangküm coaching license agizüka coach ka akümtsü asoshi bilemdangdar,” ta Xavi-i ashi.
Xavi küm 14 international jenjang nung asayaa aruba mapang nung pai Spain atema 133 ben asayaogo, aser iba mapang nung 2010 küm World Cup aser 2008 o 2012 nung European Cup, ta koktetogo.