Yimli nung tuluba

Tsüngrem yimli nung uluba o alima yimli nung uluba na tetsüngdaji tuluka lir. Alima yimli nungbo shibai tangar nem tenzükdaktsür pa ulur saka Tsüngrem yimli nungbo shibai tangar tenzüker paji tuluba asür. Tetezü Tsüngrem yimli nung uluba o alima yimli nung uluba na asadangtsübaji yimya kenyongi balala lir. Asenok alima yimli aser loktiliba nungbo takar, tulur, tobur tajung aser nüngtugu nisung nem akümtsübu agüja uludaktsür. Nisung kaji kanga ochimashi asütsüa akok, nüktapangtar asütsüa akok mesüra nisung tepseter asütsüa akok, saka asenok loktiliba nung itemji kecha masü, parnokji takar süra aser parnokji tulur süra, asenokibo parnok nemji aküm agüja külemtsü. Aji oda, alima yimli nungbo takar aser tulurtemi sensaker aser tilartem metenzüktsü kechiyong tangar tenzüktsübaji alima yimli nung maksü amai bilemer. Ajisüaka, Tsüngremer yimli nungbo yamaji masü, shibai tangar tenzüker pa mesüra laji tuluba. Tanü asenok kotak nung masü alima nung alir, ajisüaka Yisui ashi ama, asenok ya tang Tsüngremer yimli nung alir. Ibayongji tanü asenok den iba yimobilem nung Kotak yimli indang masü Tsüngremer yimli indang jembir. Tsüngrem meteter mesüra Tsüngrem dak amangertem asoshi ajak dang tilatiba kümer tangar tenzüktsübaji kotak nung tenzüktsüba masü saka iba alima nung, tang ama, Tsüngremer yimli nung alidang tenzüktsü asoshi ashiba lir. Kotak mesüra molumi nungbo tuluba aser tilaba akümtsü maongka mangutsü aser mapanga malitsü südi. Aji oda Yisui ashiba ama, shibai tuluba kümner pai iba alima nung Tsüngremer yimli nung alidang tangar angüma lur tenzüktsüla. Nisung shibai pei ajungtsü indang mebilemi tangar tenzüker, shibai tangar nungi tenüngsang angutsü asoshi masü saka temeim agi yarir aser shibai tangar dang aremzüka tenzüker, pa mesüra laji dang Tsüngremer yimli nungbo tuluba ta Tsüngremi züngshir. Tsüngremi züngshiba o nisungi züngshiba na tepilaji ibaji lir. Ajisüaka, aiben asenok taküm aser kibong ajunga bendanga agütsür Tsüngrem tenzüktsü nangzüker inyakertemia dena Tsüngrem yimli nung ulutsü meranger masü saka alima yimli nung ulutsüang meranger. Ibayongji, tenzükertem rongnunga tila mekümtetter, tangar dang maremzüktetter aser alima yimli nung alir takar aser tulurtem ama linür. Ibayongji, tanü asenoki alima yimli o Tsüngrem yimli na nung ulutsüba indang mebendangteti uluteper. Idangji alimai yimli agi Tsüngrem yimli amokseper. Iba ama jakla asenok dak anguba agi, Yisui ashi, shibai tuluba kümner pa tilaba akümtsü. Aji oda, tanüa asenok alima yimli nunga shirnokisa kanga uluner parnokji mapang tatsüka tsüngda kanga ilaa akümba asenoki angur. Yisu asütsü mapang anasa arudang, kaonung ki ka nung temaba takdang ka nung Pa par nütsüngtem den külemi chiyongtsü mena liasü. Ashiko, idangji nütsüngtem mulungjang ajak nung peisasa pei ulunüba jakla Pai ajitet südi. Anungji, Pai tzü agi Par nütsüngtem ajak tetsüng shidoktsü aser Pa nangri kanga aliba sü agi aidoktsü aser ashi, ” ni nenok Kibuba aser Tesayuri nenok tetsüng shidoktsüra nenoki kati ka tetsüng shidoktsütsüla……nenoki itemi meteta benshira temoatsü asütsü.” (Yohan 13 & Luke 22.)  Alima yimli nungbo kilir aika aliba nisungjiang tuluba saka Tsüngrem yimli nungbo kilirbajiang tuluba lir. Nai tangar metenzüktetra, memenudang Tsüngrem yimli bushia sarasademang.