Nagaland MP, Rio-i Manipur Bill tem agiendaktsüner

New Delhi, October 03 (Agencies): Honibar nü Nagaland nungi Lok Sabha züngsem, Neiphiu Rio-i Ato kilonser Narendra Modi dang, state lisopurtem temeten kümzüktsü atema Manipur Assembly nung agizükba Bill asemji magizüktsüla, ta mepishiogo.

Rio-i shidi ka ajanga Ato kilonser dang, “Lokti tentettem aser tribal tentet tulutem den kaketshir tentettemi lungkak aiter,” ta ashi.

“Item tatalokbatem ajanga, item bill tem agi temulung melemtep adokba aser nüburtemi mulungba aser taginüba anemba temaitsü sayur,” ta paisa ashi.

August 31 nung agizükba bill tem ajanga, ita ka piyong lenden nung aliba district temi Inner Line Permit (ILP) takhangba agüja aruba anena liasü.

Ajisüaka Naga, Kuki, Zomi aser Hmar tribe temi, bill asem ajanga tang tribal hills tesemtem kümzüka aliba jenjang raksatsü aser tanga state tem nungi masü saka lenden nung aliba Meitei nüburtem ajanga nütsüng timba küma tebilemtsü ajurutsü, ta ashir.

Tawa Manipur assembly nung agizükba bill asemji Protection of Manipur People Bill, Manipur Land Revenue & Land Reforms Bill (Seventh Amendment) aser Manipur Shops & Establishments Bill (Second Amendment) lir.

“Iba tensa shisadanga, Manipur state tesem ajaklen rara taliba adoktsü aser mepetmesü adoktsüsa reprangteter, ni India sorkar dang Manipur Legislative Assembly nung agizükba bill temji magizüktsü mepishir, kechiyong item bill ya ajanga tribal nüburtemi mulungba aser taginüba kongshir,” ta Nagaland People’s Front nung lenir aser MP, Rio-i Ato kilonser dangi züluba shidi nungjisa shia