1 buba Aircraft Carrier tongpang raratsü renema lir: China

Beijing, November 15 (Agencies): China’er mezüngbuba tayimtsü bentetba rongi tongpang raratsü terenemshiba tembanga agiba osang ka China sorkari tanü, Mongolbar nü sangoktsüogo.
China-i Liaoning ta ajaba aircraft carrier rongi tongpang raratsüsa terenemshiba agiba ya par linüki taoba mapang bendang linüktem nungi teyari agia aruba sülen tan mezüngsüa peisasa tongpang nung amshitsü tongti rong yanglua, kasaji tongpang raratsü atema takok ngua renemshitsü tenzüker lir.
“Ozü aircraft carrier rongi arrür mashika den tongpang raratsüsa terenemshiba agiogo,” ta Liaoning rong nung political commissar, Senior Captain Li Dongyou-i osang jangjashitsü.
China-i tan tatem küma renemshiba rong ya Ukraine nungi küm 10 shi tejaklen alizük aser iba mapang nungi tenzüka, rongji tajungba küma yanglushir külen 2013 küm nungi tenzüka par tzüyim nung duty inyaktsü tenzüka liasü.
China-i par Liaoning rongji kechi yimya nung amshitsü iba osang alima dang tanü tashi sangokja mali saka kidangsüa aliba linüktem den mangatettep adokdak, South China Sea (SCS) tzüyim shilem nung par mitkar tashi sayutsü nükjidong nung China’er tzüyim sepaitemi iba rong ya amshiba osang angazükogo.
Ano, kanga kara aintsü tenzükba China’er tzüyim sepai nung lenirtem nem terenemshitsü agütsütsü maparen nunga Liaoning rongji amshiba osang jangjaogo.
China linüki maneni aircraft carrier rong tasen ka yanglutsü tenzüka lir.