1 buba IG Academy Sports Meet sentong agiogo

Dimapur, September 03 (TYO): Indira Gandhi (IG) Sports Academy nung saisapongtsü terenemshiba agir asayartemi par saisapongtsü sentong Kohima kübok Indira Gandhi Stadium nung tanü, Honibar nü agiogo.
“Asayartemi tazüokba lia saisapongtsü ajungshir kechiyong asayadak aser taküm shilem ajunga nung tazüokba nung alitsüji kanga dang tongtipang lir. Asayar ka dak tazüokba jakla melira, pa mesüra lai takokba kodanga mangutsü,” ta tongti tesemdanger, Additional Director, Youth Resources & Sports (YR&S), Neilalhoulie-i metetdaktsü.
“Saisapongtsü sabang nung takok ngua shilem agiba ajanga peipok mesütsüsa rongsen tajangzüka angur aser tanübo takartiba nisungtem rong nung asayartem timba densema lir,” ta pai shisem.
Asayar ka ama pa taküm nung ajangshiba tajangshiba otsü kar lemsatepba den külemi, saisapongtsü aser kaketshisatsü bushitsü sabang nung sako takokba angutsü nungdakba olen ka Deputy Director, YR&S, Nizheto Awomi-ia tanü lemsatepa liasü.
“Saisapongtsü shilem balala nung terenemshiba agidaktsütsü nükjidong nung iba asayamong ya tan mezüngsüa ayonga agir lir,” ta IG Academy nung Administrator, Jakedovo Chase-ia tanü sentong nung metedaktsü.