1 buba Inter-Departmental Football asayamong tenzüker

Dimapur, August 05 (TYO): Tongti tesemdanger, Deputy Commissioner, Mokokchung, Sushil Kumar Patel IAS-i lapoktsüba sülen Changtongya kübok densemba sorkar department-tem rong nung 1 buba Inter-Departmental football asayamong yashi, Mongolbar nü nungi tenzüka Changtonya Town local ground nung asayatsü tenzükogo.
“Changtongya sub-division kübok densemba sorkar department balala rong nung tesendaktep tajung alitsüsa iba ama asayamong ayongba atema tayonger dang kanga pelar,” ta Patel-i metetdaktsü.
“Tarutsü putu lanurtemi tangazükba tajung angutsüsa asayar shia yimya tajungba nung bendanga agüja shilem agitsü ajungshir. Ano, department shia nung lenisütsü menden bena alirtemi nenok rong nung tesendaktep tajung ayutsü maneni ajungshir,” ta pai tajungshiba olen ka lemsatep.
Iba asayamong ya tan August ita 15 nü tembangtsü sentong lir.