1 buba tetsür Taiwan Tir, Tsai-i Tir inyaktsü tenangzükba agiogo

Taiwan yimtiba, Taipei nung agiba Tir inyaktsü tenangzükba agiba sentong nung Taiwan Tir tasenba, Tsai Ing-wen (Achijilen) aser taoba Taiwan Tir, Ma Ying-jeou nati shilem agiba noksa ka yangi angur. (Taipei, May 20)

 Taipei, May 20 (Agencies): Mezüngbuba tetsür Taiwan Tir, Tsai Ing-wen-i Tir inyaktsü tenangzükba tanü, Hokolbar nü agiogo.

“China aser Taiwan na tsüngda tesendaktep junga aliba ajanga ozü linük ana densemba region nung tensa junga akümtsü aser ibaji ajanga yimji yimjung alitsü,” ta Tsai-i Tir inyaktsü tenangzükba agidang metetdaktsü.

“China aser Taiwan na tsüngda tesüiba mapang adokba mangatettep ajunga agiener tanaben sentaktepshitsü asoshi jembitepba ajanga linük anaprong indang nüburtem nem tajangzük bener arutsütsü,” ta shia, China den yimjung nung alitsü tenangzükba ka lai sangoktsü.

“East China Sea aser South China Sea na den sentakba mangatettep ken o adoka liaka, arok tajangzük alitsü nükjidong nung China den tesendaktep junga ayutsü nangzüker,” ta lai nenshia ashi.

Tsai-i aniba Democratic Progressive Party (DPP) yimtenren teloki taküm January ita agiba parliamentary aser Tir election nung temaba jenjang ngua, par Taiwan indang yimsüsütsü tashi abentsü temeten angu.

China kübok lia, China den tesendaktep junga ayutsü tangatetba ayuba Nationalist Tir, Ma Ying-jeou-i Taiwan madak küm 8 tashi yimsü asüba sülen China nungi nüchiso ngua peisasa pei madak yimsü asütsü temeten bushiba DPP yimtenren teloki tan Taiwan linük indang yimsüsütsü tashi benoker lir.

Tesüiba mapang, 1949 küm China nung tentetba Communist telok den raraba tongpang nung tamakok ngua, Chiang Kai-shek-i aniba Nationalist züngsemtemi Taiwan-i oa idakji jenoka alitsü tenzük aser iba yongji China-i tanüa Taiwan par yimli kübok aiter ta züngshir.

Taoba ita 13 nungi tenzüka Taiwan indang rongsenren jenjang mejungi akümba mapang ka nung Tsai-i Taiwan Tir menden benoker lir.

Ano külen, “Taiwan-i sorkar tasenba kübok peisasa pei madak yimsü asütsü temeten bushira, Taiwan nung tensa mejungi küma yimji yimjung melitettsü,” ta shia, China’er Taiwan Affairs Office-i Taiwan amokmerenba olen ka Tsai-i Tir inyaktsü tenangzükba agir ghonda ishika tsüngda nung metetdaktsüogo.