1 Day Penalty tetoktepba agiogo

Dimapur, September 19 (TYO): Ao Students’ Union, Dimapur Govt. College (ASU-DGC)-i ayonger külen DGC football ground, Oriental Colony nung 1 day penalty tetoktepba tanü Honibar nü agiogo.
“Saisapongtsüren nung tajungtiba agüja shilem agitsüji lanuwa mapang lir. Saisapongdang takok mesüra tamakok ajurubaji masü saka temzüng ozüngi melaba ama yimya tajungba nung toktepa shilem agibaji tongtipangba lir,” ta tongti tesemdanger, Limasunep Jamir, IPS, DIG Range-i kaketshirtem ajungshia ashi.
“Lokti nung yimji yimjung bener arutsütsü maparen nung saisapongba ya tongti shilem ka lir,” ta shia, kaketshirtremi lokti jenjang tajungba kümdaktsütsü aser kin balala rong nung telongjem lidaktsütsü atema bendanga agüja inyaktsü tajungshiba olen ka pai metetdaktsü.
“Iba ama tetoktepba sentong takok ngua ayongba ajanga kaketshirtemi tarutsü mapang lenisütsüren nung tongti shilem agitsü nükla tajung angur,” ta shia, tongti tesemdangeri kaketshirtem nem tenüngsang agütsü.
ASU Tir, Bendangchuba-i ajak pela agizükba sülen ASU Senyur, Dr. Maongsangba-i sarasadem mapang agia tanü tetoktepbaji tenzüka liasü.